சதா ரணமாகும் தேர்வுகள்

சாதாரணம்

சதா ரணமெனும் 

சகல கலா ரணமாகுவதாக

சத்தமில்லா யுத்தமொன்று

சங்கடம் தருவதாய் சிலரும்

சங்கெடுத்து ஊதுவதாக பலரும், 

என்னைப் பார் 

என் பெண்ணைபபார்

உன்னை போல் என் 

உறவில்லை என்போரும்

கற்றலை,குற்றமாக்கி

தேர்வின் புள்ளிகள்

வாழ்வின் கரும்புள்ளிகளாய்

வடுக்களாய் தங்க வைப்போரும்

தாம் கடந்த முட் பாதை அறியாதோராய்...!?

சாதாரணமாக கடந்தவைகளெல்லாம் 

சாதனைப்பட்டியலில் இடம் பிடிப்பதும்

சாதனைகள் செய்வோரை சகதியில் எறிவதும் 

சாத்தானின் போதனைகளாய் கடப்போம்.

நீ நானாகவும்,

நான நீயாகவும் 

அவன் அவளாகவும்

அவள் அவனாகவும்

ஒப்பீடு தப்பீடாய் 

பட்டறிவும்,படிப்பறிவும்

பட்டம் போல் வானம் தொடும், 

காலமது அதை உணர்த்தும்

தேர்வென்பதன் வெற்றிகளால் கொக்கரிப்போர் 

வாழ்க்கை தேரென்பதை இழுக்க

முடியாதோராய்..... ?

கற்றறிந்தோர் முயலாமையினால் 

முடங்கி விட............!?

பட்டறிவால் வென்றோர் உயர்ந்து நிற்க 

முயல் ஆமை கதை இங்கே நினைவில் வரும்,

தோற்றவர்கள் வீழ்ந்ததில்லை

வென்றவர்கள் எல்லோரும் வாழ்ந்ததும் இல்லை.

வாழ்க்கை என்பது ஒரு வட்டம், 

காலம் மாறும் காட்சிகள் கலையும், 

கலைந்த கனவுகள் 

தொலைந்த இரவுகள

கனவாகிப்போகும்,

வாழ்வென்றால் போராடும் போர்க்களமே.. 

நம்பிக்கை எங்கள் தும்பிக்கை!

அவரவர் அறிவும், ஆற்றலும் அவரவர்க்கே உரிமை.

மனித ஆற்றல் சக்தி வாய்ந்தது, 

தினம் மலர்வதும் உதிர்வதனாலும் பூக்கள் சினப்பதில்லை. 

நீங்கள் நாள் தோறும் புதிதாக மலருங்கள்

வாழ்க்கை உங்கள் வசப்படும்........!

#சதா_ரணமாகும்_தேர்வு

சதா ரணமாகும் தேர்வுகள்

#ஆல்ப்ஸ்தென்றல்நிஷா

ஒரு பிடிச்சோற்றின் முன் ...!

வண்டல் நிலமோ பாளம் போல் வெடிக்க

நெல்மணிக்கதிர்கள் தாகத்தில் தவிக்க

கரிசல் பூமியின் கதறல் கேட்டு 

இனித்திடும் கரும்பின் சுவையும் கசக்க

பருத்திச்செடியோ செம்மண்ணின் சூட்டால் 

சுழன்று வெடித்து சுக்கு நூறாக 

வளமான மண் தேடி விவசாயி அலைய

உயிரான நீர் வளம் உருக்குலைந்திட

விசமாக்கும் வித்தையை களமாக்க துடிக்கும்

அடப்பாவி மனிதா....!

ஒரு பிடிச்சோற்றின் முன் ....!

ஒரு கிலோ தங்கமோ, ஓராயிரம் கோடியோ 

உன் உயிர்க்கு உரமாகாதுணர்வாய்....!

மூவிரண்டாய் மூழ்கி இருந்தும் 

அடி முதல் முடி வரை விரவிப்பரந்தும் 

அங்குசமின்றி ஆளுமை செய்தும் 

அணைகளை உடைத்து தடைகளை கடந்தும் 

அலைகளால் அலைக்கழித்தும் 

பொங்கிப்பெருகி காட்டாறாய் ஓடி 

நாணிடும் நங்கை போல் கொஞ்சி நடந்து 

கங்கா, யமுனா, சரஸ்வதி என்றென போற்றி

காவேரிக்காக களப்பலி கொடுத்ததும் ஏனோ?

இயற்கை தன் வளங்களை காக்க போராடுவதை

புயலாகி, சுனாமியாகி, பூகம்பமாகி நம்மை எச்சரித்தாலும் மனிதன் அதன் வலிகளை உணராமல் போகின்றான்

எங்கோ எவருக்கோ எனும் வேடிக்கைதனை களைந்து 

எம் வளங்களை காக்கும் கடமைதனை உணராமல் கடந்தோமானால் 

படம் சொல்லும் சேதிகள் நம் சிந்தனைக்கே....!

எமது சந்ததிகளுக்கு நாம் விட்டு செல்ல போவது என்ன ....?

எதிர்காலத்தில் எம் வளங்களும்....!?

#World_Water_Day

#SAVE_WATER_SAVE_LIFE

ஒரு பிடிச்சோற்றின் முன் ...!

 
 
 
 
 
 
 
 
 
படங்கள் நன்றி இணையம். 

 

மதம் எனும் மதம்!!

மறத்தமிழர்கள் மறைந்து போனதால்

மானத்தமிழினம் மதம் பிடித்தலையிது

மனிதம் மனங்களில் மரணித்து போகுது 

மனமொன்றிங்கே மௌனமாய் கதறுது!!

நடப்பதெல்லாம் நலமாயில்லை

நாமுணரும் தருணமும் இல்லை

நாளைய தேசம் பகற்கனவாகி 

நாடுகள் தோறும் அகதியாய் அலைவோம!!

இன வாத விசத்தால் 

இலங்கை தீவை 

இரு கூறாக்கி 

இருப்பை தொலைத்தோம்!!

உரிமை கேட்டோம் 

உடமை இழந்தோம்

உணர்வுகள் மரத்தோம்

உயிர்ப்பை அழித்தோம்!!

விடுதலை தேடி 

வீட்டை இழந்தோம்,

நியாயம் பேசி 

நிம்மதி தொலைத்தோம்!!

மதம் எனும் பெயரால்

மனங்களை பிரித்து

தமிழர் நாம் இனி 

தனித்து வமாவோம்!!😭👿

தருமங்கள் தவறுதே?

பட்டென்று போனதென 

பொட்டில் அடித்தால் 

போலொரு நொடி 

துடிக்குதே எம் நாடி.

நல்லவர்களெல்லாம் 

சட்டென்று விண்செல்லல் 

வீணர்களிற்கே 

இடமென்றுணர்த்திடுதே.

எவருக்கும் இடமிங்கே 

நிரந்தரமில்லை என்றுணர்ந்தாலும்

இவரிங்கே இனியில்லை 

உணர்வுகள் துடிக்குதே

சட்டென,சடுதியில் சலசலப்பில்லாமல் 

சென்றிடல் வரமாய் தானிருந்தாலும் 

யாம் என நினைப்போர் செய்

தருமங்கள் தவறுதே?

ஒத்தை மகளை பொத்தி வைத்து 

பத்திரமா பாதுகாத்த வித்தை கண்டு 

காலனுக்கிங்கே பொறுக்க வில்லையோ?

இளவயது மலரது உதிர்வது கொடியது.
இருப்போரை இறக்க வைக்கும் வலி தருவது.

இரு சின்னஞ் சிறு அரும்புகளையும் நான்கு வயதே ஆன மொட்டையும் விட்டு மலரது உதிர்ந்து போனது. 34 வயதில்  இரட்டை பெண் குழந்தைகள் பிறந்து ஒரே வாரத்தில்  தான் உதிர்ந்து போகும் கொடுமையை என்ன வென்பது? 

பக்தி

பக்தி முத்தி சக்தியே சரணமென்பார்

சித்தி பெறவே சுத்தி வந்தேனென்பார் 

முக்தியைத்தேடி புத்தியைத்தொலைப்பார்

நித்திய வாழ்வே நிரந்தரமென்பார் 

சித்தம் கலக்கிட பித்தனாயலைவார்! 

கொத்திடும் காக்கைக்குணத்தினை மறைப்பார் 

வித்தைகள் காட்டி வியக்கவும் வைப்பார் 

உத்திகள் செய்தே யெம்மை அசைப்பார்

பக்தியின்றியே பக்தன் போலலைவார் 

சித்தன் நானென்றே ஏத்தி வைப்பார் 

எத்தனுக்கெத்தன் உண்டென உணர்ந்தே

பக்தனே நீயுன் புத்தியை தீட்டு! 😍

இந்த சீதைகள் நிருபித்தது

விம்மித்துடிக்காமல் ஓடி ஒளியாமல்
கண் முன் எரிகின்றாள் - அவள்
நீதியை எரிக்கின்றாள்.
அநீதிக்கு துணை போகும்
அக்கிரமக்காருக்கே
அகிலத்தில் இடமுண்டாம்
அவள் சொல்லிச்செல்கின்றாள்.

பச்சிளம் குழந்தை அது.
கத்திக்கதறவில்லை
பற்றும் தேடவில்லை
தென்றலாய் வருடுவதாய்
எரி தணலை எதிர்வு கொண்டே
நிமிர்ந்தே நிற்கும் அவள்
திட மனதை என்ன சொல்வேன்!!!!!

சட்டி பானையெல்லாம் விற்றும்
வட்டி குட்டி போட
இரத்தப்பசியில் பலிவாங்க
பிணம் தின்னும் கழுகுகளாய்
கொத்திக்குதறத் துரத்த
பசுவும் கன்றுமாக கதறித்துடித்து
நிதம் பதறும் நிலை காண மறுத்து
நெருப்பில் பொசுங்கிடுமுன்
தட்டிய கதவுகளை மூடியே வைத்திருங்கள்.
பாவி அவனென்று சாபம் கொடுத்திடுங்கள்

எத்துணை திடமிருந்தால்
நிமிர்ந்தே நின்றிருப்பாள்?
அத்துணை யாருமின்றி
எதிலியாய் பொசுங்கி
எரிந்து கரிந்து சரிந்தது
அவளுடல் மட்டுமா?

தன்னை நிருபிக்க இராமனின் சீதை தீக்குளித்தாள்
இந்த சீதைகள் நிருபித்தது தேசத்தின் அவமானம்.

படம் இணையத்தில் இருந்து 

கடைசி வரை யாரோ?

உள்ளதை உள்ள படி

நடந்ததை நடந்த படி 

கடந்தவை கடந்த படி

உணர்ந்ததை உணர்ந்து படி

இன்று நடப்பவை யாருக்கோ எவருக்கோ தானே என கடந்தபடி செல்லும் நாம் அப்படிகளை தாண்டும் சூழலுக்குள் தள்ளப்படுவோம் என்பதை உணர்ந்தே கடப்போம்.

நாம் வாழும் காலத்தில் நம நலனில் அக்கறை காட்டி புத்திமதி சொல்பவர்களை தூரமாய் நிறுத்தி நமக்குத்தேவையில்லாதவர்களாகி ஒதுக்கி அவர்களின் திட்டலுக்கும் குட்டலுக்கும் பின்னிருக்கும் ஆழ்ந்த அன்பை உணராமல் சட்டென கோபம் கொண்டு விலகிச்சென்று விடுகின்றோம்.

குறைகள் சொல்லாத, போலித்தனமானவர்களை உண்மை நட்பென நம்பி உயர்த்தி மதிப்பளிக்கின்றோம்.

சூழ்நிலைகள் எங்கே எவருக்கு சாதக. பாதமாகும் என எவராலும் நிச்சயித்திட முடியாது.

விதியை மதியால் வெல்ல நினைப்பதும், எதிர்காலக்கனவுகளைக்குறித்த திட்டமிடலும், என்னாலே எல்லாம்முடியும் எனும் செருக்குடனும், 

நாமும் துன்பப்பட்டு, அடுத்தவரையும் துன்பப்படுத்தாமல் நல்லதை நினைப்போம், நல்லதை செய்வோம்.

நட்பெனப்படுவதும், உறவெனப்படுவதும் உள்ளதை உள்ளபடி உள்வாங்கி கண்டு கொள்ளாமல் செல்வது அல்ல. நன்மை, தீமை உணர்ந்தி வழி காட்டுவதே!

இவ்வுலக வாழ்வெனப்படுவது நீண்ட தூர ரயில் பயணமே! நிலையான தரிப்பிடம் நமக்கு இங்கே இல்லை. நிர்வாணியாய் வந்தோம், நிர்வாணியாய் செல்வோம், நாம் செல்லும் போது நாம் ஓடி ஓடி சேர்த்த பொன் பொருள் எதுவும் நம்முடன் வரப்போவதே இல்லை.

எத்தனையோ திட்டங்களை தீட்டுகின்றோமே.. மரித்தபின் என்னாவோம் என யோசித்திருக்கின்றோமா?

நான் எனும் அகந்தை அழிந்து அதுவானபின் என்னவாவோம்?

சுயமில்லாமல் உணர்வற்று உயிர் வற்றி போனபின்னரான சூழலை எதிர்கொள்ளும் படியாக நம்மை சார்ந்து நம்பியிருப்போரைக்குறித்து சிந்தித்திருக்கின்றோமா? .

• ஒரு மரணம், தாய், தாரமிருந்தும் அனாதைப்பிணமாக எரிக்க அரசு முடிவெடுத்ததாக அறிந்த   தாயின் கதறலையும் தாய் மாமன் பதறலையும் அருகிலிருந்து உணர்ந்து இறுதிக்கிரியைகளை செய்யவேணும் அவன் உடலை பெற்றுக்கொடுங்களேன் எனும் இறைஞ்சி நின்ற போது  மொழி புரியாமல்  புலம்பெயர் எங்கள் இனம் படும் பாடுகள் கண்டு என் மனம் துடித்தது..சடலத்தினை வைத்து வேட்டையாடும் மனிதர் குணம் கண்டு அதிர்ந்தே அடங்கியது.
• இறுதிச்சடங்கை  செய்ய அவன் உடலை பெற்று அவனை அதற்கான வாகனத்தில் அனுப்பும் வரை நாங்கள் அலைந்த அலைச்சலும் பாடுகளும் எனக்குள் மிகப்பெரிய தாக்கத்தினை தந்திருக்கின்றது.  என்ன தான் காசு பணம் சேர்த்து வைத்தாலும் கடைசி நேரம் துணை வரவும், துணாய் நிற்கவும் நான்கு மனிதரையேனும் நாம் சேர்த்து வைக்க வேண்டும். 

நாங்கள்குடும்பமாய் வருடத்துக்கு ஒரு வாரம் சேர்ந்து நான்கு பேரும் இத்தாலி செல்ல விடுமுறைப்பயணம் திட்டமிட்டிருந்தோம், பயணத்திட்டத்துக்கு முதல் நாள் நதியில் கண்டெடுத்த சடலத்தினை உறுதிப்படுத்த டீ,என்ஏ டெஸ்டுக்காக தாயை அழைத்த போதே புரிந்து கொண்டேன். (நாங்கள் இங்கே  மொழிபெயர்ப்பு மற்றும் உதவிகள் செய்வோம், சர்ச் ரிதியிலான ஊழியம் கடந்த இருபது ஆண்டுகளாக இனமதம் மொழி பாராது அர்த்த இராத்திரியானாலும் பிரச்சனை உதவுங்கள் என கேட்பவர்களுக்கு உதவி செய்கின்றோம்). அதன் பின் பயணத்திட்டம் கைவிடப்பட்டு பிள்ளைகளும் சரியாக புரித்துணர்வோடுஒத்துழைத்து இவ்வருடம் இல்லாவிட்டால் என்ன அடுத்த வருடம் செல்வோம் என பேசி இங்கே இருந்து அனைத்தையும் ஒழுங்கு செய்து இன்னும் அதற்காக காரியங்கள் முடியவில்லை.. உண்மையில் நாங்கள் இத்தாலி புறப்பட்ட பின் இப்படி செய்தி அறிந்திருந்தால் அந்த தாயின் நிலை குறித்து எங்களால் நினைக்கவே முடியவில்லை. ஏன் எனில் அவர் நீரழிவு நோயினால் பாதிக்கப்ட்டு இரு கால்களும்  நடக்க முடியாத நிலையில் இருக்கின்றார். இத்தாலி பயணத்திட்டம் ஒரு மாதம் முன் ஆரம்பித்தும் நான் ஹோட்டல் ஏதும் புக் செய்யாமல் போகும் முதல் நாள்  போன் செய்து  புக் செய்வோம் என தள்ளிப்போட்டதும்   காரணத்தோடு தான் என்றானது. 

இந்த உணர்விலிருந்து சீக்கிரம் மீண்டு வர வேண்டும் என நினைத்தாலும் தொடரும் காரியங்கள் அது எளிதானதலல் என்றே உணர்த்தி நிற்கின்றது. பார்க்கலாம். யார் பதிவும் படிக்கவில்லை, மனசு சேன்ஞ் ஆக எதிர்பார்த்து அவ்வப்போது பேஸ்புக்கில் அமர்வதோடு சரி

மரணத்தின் பின் சடலத்தை வைத்து  அலைந்த அலைச்சல்களின் தாக்கத்தினால் என் மன உணர்வுகளை அந்த நொடியே கண்ணீர் அஞ்சலி ஆக்கினேன்.  

 

நீர் நாடி துடிக்கும் நிலமகள்!

நிலமதை சூழ நீரிருந்தாலும்  - பூ மகள்
தூய்மையை  அழித்திடும் போதினில் 
வான்மகள் பொய்த்து  மண்வளம் குன்றி
நீர்நாடி தவிர்க்கும்  உயிர் வதை உணர்வீர்

பாளம் பாளமாய் பாறைகள்  தோன்றி 
நிலமகள் நித்தம் துடித்திடு முன்னே
சீர்மை கொண்டு சிறப்பாய் நின்று 
பாரின் தேவையை  சட்டென உணர்வீர். 

சேற்றில் உழன்றாலும் செம்மணிக்  கதிர்கள்
சிலிர்த்து நிற்பதே சொர்க்கம் என்றுணர்ந்தே 
நாட்டின் தேவையை  சிந்தையில் விதைத்து 
ஆலம் விதையாகி  விருட்சமாய் உயர்வீர்.   

ஆழிக் கரையினில்  ஆழியாய் சுழன்று   
நதிகளை இணைத்து  நாற்றுக்கள் நட்டு 
துளித்துளியாக துடித்திடும் உயிரை
பனித்துளி கொண்டு உயிர்த்திட வாரீர் 

நஞ்சையும் புஞ்சையும் கொஞ்சிடும் தஞ்சை 
மஞ்சம் கொண்ட பஞ்சத்தில் தஞ்சம் 
நஞ்சுண்ட மாந்தர் வெஞ்சினம் கொண்டே 
வெறுமையை உணருமுன் விரைவாக வாரீர் 

காடும் களனியும் கதிரவன் வீச்சால் 
கருகிடல் கண்டு துடித்திடும் நெஞ்சம்
ஊருக்கு சோறிட்ட உத்தமர் கரங்கள்
உயிர்ப்பிச்சை கேட்கும் நிலைதனை கேளீர்

நாளை வருவதை இன்றே உணர்ந்து 
நானிலம் செழிக்க நன்மைகள் நாடி
மடிந்திடும் மனிதனின் மகத்துவம் புரிந்தே 
மண்காக்க இன்றே  புறப்படுவீரே.

நாளை என்பது நிச்சயம் இல்லை  
நாட்டின் வளமும் நம்மிடம் இல்லை 
நானெனும் சுயமும் நம்முள்ளே இல்லை 
நாமென இணைந்தே நன்னிலம் காப்போம். 

படங்கள் நன்றி  இணையம்

SAVE WATER SAVE LIFE - ஒரு பிடிச்சோற்றின் முன்

மூவிரண்டாய் மூழ்கி இருந்தும் 
அடி முதல் முடி வரை விரவிப்பரந்தும் 
அங்குசமின்றி  ஆளுமை செய்தும் 
அணைகளை உடைத்து தடைகளை கடந்தும் 
அலைகளால்  அலைக்கழித்தும் 
பொங்கிப்பெருகி  காட்டாறாய்  ஓடி 
நாணிடும் நங்கை போல்  கொஞ்சி நடந்து 
கங்கா, யமுனா, சரஸ்வதி என்றென போற்றி
காவேரிக்காக களப்பலி கொடுத்ததும் ஏனோ?

வண்டல் நிலமோ பாளம் போல் வெடிக்க
நெல்மணிக்கதிர்கள்  தாகத்தில் தவிக்க
கரிசல் பூமியின் கதறல் கேட்டு 
இனித்திடும் கரும்பின் சுவையும் கசக்க
பருத்திச்செடியோ செம்மண்ணின் சூட்டால் 
சுழன்று வெடித்து சுக்கு நூறாக 
வளமான மண் தேடி விவசாயி அலைய
உயிரான  நீர் வளம் உருக்குலைந்திட
விசமாக்கும் வித்தையை  களமாக்க துடிக்கும் 
அடப்பாவி மனிதா! 
ஒரு பிடிச்சோற்றின் முன் 
ஒரு கிலோ தங்கமோ,  ஓராயிரம் கோடியோ 
உன்  உயிர்க்கு உரமாகாதுணர்வாய். 

ஆடுவது தாண்டவம் தானா?

தட்சனின் மகளென்றாய் ஆடுவதும் தாண்டவமென்றாய்
நிலவென்றாய் உலகென்றாய் விட்டிலானேனென்றாய்
விட்டகுறை தொட்ட குறை அத்தனையும் உண்டென்றாய்
சொல்லுக்குள் சொல்லாகி சோக கீதம் படைத்தாய்
அத்தனையும் அர்ப்பணிப்பாய் ஆண்டாளுக்கே என்றாய் 
முழுமதியாள் முகம் கண்டால் சுடுகின்றதே என்றாய்
சுட்டு விடும் சூரியனை தூரமாய் ஒதுக்கி விட்டாய்
எட்டி நிற்கும் நிலவினையே தொட்டு விடத்துடிப்பாய்
தொட்டு விட்ட அகமனதை புறமாக்கி தொலைத்திடுவாய்
.

நீ நடந்தால் உடன் நடக்கும் நிலவுக்கும் களங்கமுண்டு
வெண்மதியாள் முகம் மறைக்கும் நாட்களும் இங்குண்டு
நாள் தோறும் தனை சுற்றி தனில் தானே உயிர்த்து
தனை சுற்றும் போதினிலே பூக்கோளமதை குளிரச்செய்து
கதிரவனின் கதிர்க்கணைகள் கன்னம் வைத்து தாக்காது
காத்திடும் அரும்பணிக்கோர் மகுடமுண்டு நீ உணர்வாய்
முழுமதியும் காரிருளும் நிறைமதியாள் வசமாகி
தானியங்கியாவதனால் ஞாலமதில் காலமது கனிகிறது.
எதற்கும் ஒரு காலமுண்டு, காரணமும் பல உண்டு
❤

நெருப்பாற்றை கடந்து விடும் நெஞ்சுரம் தனை பெறவே
புடம் போடும் பணிதனையே பக்குவமாய் பதம் செய்தே
தடம் பதிக்கும் நாளிலிலே நிலவுமகள் பின்னிருப்பாள்
மேகத்தின் நடுவினிலும் விடிந்து விடும் பொழுதினிலும்
வீட்டு வாசற்படியினிலும்  வெண்மயிலாள்  துணை வருவாள்
நின் மதியின் நினைவுகளில் சிவனாடும் நர்த்தனமாய்
வரியாகும் காரணத்தை சுயஅகத்தில் தேடுவோரை
துச்சமின்றி தூரமாக்கி சிந்தனையை பறக்க விடு
நித்திலம் போற்றிடும் நாளும் வரும், நிம்மதியே வசமாகு
.❤.

இலங்கை தேசத்திற்காய் இறைவா! நீர் வர வேண்டும்

இலங்கைக்கான வேண்டுதல்களை செவி கொடுத்து கேட்க இறைவனுக்கும் மனமில்லை போலும்! அழிவுகளும் அழிப்புக்களும் தொடர்ந்து கொண்டெ இருக்கின்றது. அம்மக்களும் சாம்பலிலிருந்து மீளும் பீனிக்ஸ்களாய்தம்மை தாமேகட்டி எழுப்பினாலும் மீண்டும்மீண்டும் அழிவுக்குள் இரையாவதுமாய் தான்  இருக்கின்றார்கள்!

சின்னஞ்சிறிய தேசம், யுத்தம், சுனாமி, யுத்தம், வெள்ளம், புயல், என எத்தனை தான் தாங்கும்? கடந்த சில வாரங்கள் இயற்கையின் கால் மாற்றத்தினால் கடும் வெயில், வெயிலின் கொடுமை தாங்க முடியாமல் புற்றுக்களின் குடியிருக்கும் சகல ஜீவராசிகளும் குடியிருப்புக்கள் நோக்கி குடிபுகுந்து மக்கள் தூக்கத்தினையும் நிம்மதியையும் பறித்தன!முக்கியமாக பாம்பினங்கள்
இலங்கையின் கிழக்குப்பகுதியின் இருக்கும் எங்கள் வீட்டுக்குளேயே தினம் நான்கைந்து பாம்புகள் வந்தும் அடித்துகொல்வதுமாய் பதட்டமான சூழலில்இருந்தார்களாம்! நீர்நிலைகளில் நீர் வற்றிப்போக குடிநீர் தட்டுப்பாட்டுடன் வெயில்க்கொடுமையில் மக்கள் மயங்கி விழுவதும் மரணமடைவதும் செய்திகளாகின!வெயிலின் அகோரத்தினால் வீட்டினுள் நிறுத்தியிருந்த மோட்டார் வண்டி வெடித்து வீடொன்று எரிந்த சம்பவமும் இலங்கை வடக்குப்பகுதியில் நடந்தது!
இவ்வாரமோ காற்றழுத்த வேகம் புயலையும் மழையையும் உருவாக்க நள்ளிரவின் வீட்டின் கூரைகள் பறந்தோட, வீதியெங்கும் மரங்கள் ஒடிந்து விழ போக்குவரத்துப்பாதிக்கப்பட்டு,மின் தடைகள் தொடர இலங்கையின் பிரதான நதியான களனி ஆறும் இதர நீர் நிலைகளிலும் நீர் மட்டம் உயர்ந்து கொழும்பும் அதை அண்டிய மத்திய பிரதேசங்களும் வெள்ளத்தினுள் மூழ்கியது.
மழையினால் நீர் மட்டம் உயர நீர்வாழ் உயிரினங்களும் விடுகள் தேடி வர எங்கும் எதற்கும் வித்தியாசமில்லாத சூழலில் மின் தடையும் சேர்ந்து இலங்கையே அழுகின்றது! வெள்ளம் எனில் சாதாரண வெள்ளம் இல்லாமல் மூன்று இலட்சம் மக்களை இடம் பெயர வைத்து கோடிக்கணக்கான சொத்துக்களை அழித்துச்சென்று கொண்டிருந்தாலும் இன்ஞும் அதன் அகோரம் தொடர்கின்றது.இதற்கிடையில் தொடர் மழையினால் மலையக கிராமங்களில் மண் சரிவுகள் ஏறட்ட கிராமமே மண்ணுக்குள் புதைந்து போனாலும் இதுவரையான் இழப்பின் எண்ணீக்கை தெளிவில்லாத நிலையில் இருக்கின்றது!
மக்கள் இழப்புக்களை சந்திக்க இன்னும் சிலரோ அன்று எங்கள் மேல் குண்டு போட்டதால் இன்று இயற்கை உங்களை கொல்கின்றதென பேச பாதிக்கப்பட்டமலையகதமிழர்கள் ஏழைகளும் தமிழர்களுமாயிருப்பதால் அரசின் நிவாரணமும் மந்தகதியில் செயல்பட மக்கள் உயிருடன் உணர்வுடன் பரிதவிக்கின்றார்கள்!வெள்ளத்துக்கு தெரியுமா? தமிழன், சிங்களவன், முஸ்லிம் எனும் இனமத வேற்றுமை? அது நிறம், மணம், குணம் பார்த்தா தேடித்தேடி அழிக்கின்றது?

இனியும் நிலஅதிர்வுகளும் மண் சரிவுகளும் கடல் கொந்தளிப்புக்களும் தொடரும் என வானிலைமையம் எச்சரித்திருக்கின்றது! அங்கே எம் உறவுகளும் உயிரோடும் உணர்வோடும் வாழ்கின்றார்கள் என்பதையும் அவர்கள்ளையும் இவை அனைத்தும் பாதிக்கும் என்பதையும் நாம் ஏன் உணராமல் போனோம்?
என்ன செய்வோம்? ஏது செய்\வோம்? எங்கே தான் செல்வோம்?

இலங்கை தேசத்திற்காய் இறைவா! நீர் வர வேண்டும் என் தேச மக்களுக்கே விடுதலை தரவேண்டும் அழிவில் வாழும் மக்கள் அமைதி வழி வாழ அருள் நீர் தர வேண்டும் இருளையெல்லாம் அகற்றி பெரு வெளிச்சம் காண இறைவா! நீர் வர வேண்டும் கண்ணீர்கள்,கவலைகள்,கஷ்டங்கள் போக்க கருணை நீர் காட்ட வேண்டும் காணாமல் போகும் உறவுகளை மீண்டும் கண்டு மனம் குளிர இறைவா!நீர் வர வேண்டும் நாதியற்று தவிக்கும் என் தேச மக்களுக்கு நாடொன்று அமைத்து தர இறைவா!நீர் வர வேண்டும் நாளெல்லாம்கேட்கும் கதறலின் சத்தம் காணாமல் போக இறைவா!நீர் வர வேண்டும் நோய் நொடிகள் அகற்றி கடலலைகள் காத்த என்னருமை உறவுகள் காலனோடு போராடி,காலத்தை வென்று பல வருஷம் வாழ இறைவா!நீர் வர வேண்டும் இறைவா!நீர் வர வேண்டும்
அழிவிலிருந்து காத்து அமைதி தர
இறைவா!சீக்கிரம் நீர் வர வேண்டும்!

*********************************************

2009 ஆம் ஆண்டில் நடைபெற்ற தமிழீழப்போரின் இறுதி நேரம் மனம் கதறி வேண்டியது! இன்றும் பொருந்தும்!

இதயங்கள் இறுகியதால் இலங்கை அழுகின்றதோ?

கடந்த கால  கறைகளைகளெல்லாம் 

களனியாற்றில் கலந்தோடி

கசந்து விட்ட கண்ணீர்க் கசடுகளை நீங்கிடுமா?

காலம் செய்த கோலம் கண்டு 

இயற்கையவள் இடிமுழங்க 

இதயங்களோ படபடக்க

இனியெங்கே செல்வோம் எனும் 

ஏக்கங்கள் அதிகரிக்க

அனைத்தையும் இழப்பதற்கு 

முடிவென்பதேயில்லையா?

இலங்கையனாய் பிறந்ததனால் 

இயற்கை கூட வஞ்சித்திட

இதயங்களும் இறுகி விட

இழப்புக்கள்  இறப்புக்களாய்

எதிர்காலம் சூனியமாய் 

தொடர்கின்றது அகதி வாழ்க்கை!

ஏறிச்செல்லும் நீரின் மட்டம் 

ஏழைப்பணக்காரர் பார்ப்பதுண்டா?

இன பேதம் பிரித்தெடுத்தா

இயற்கையவள் பொங்குகின்றாள ?

இனி வரும் கால மாற்றம் 

இதயங்களை திறந்திடுமா?

இன பேதம் இல்லையெனும் 

உணர்வுகள் உயிர்ப்பெறுமா? 

இது வரை இரத்தம் ஆறாய் ஓடிய சிறு நாட்டில் இரத்தக்கறைகளை கழுவவோ என்னமோ வெயிலும் மழையுமாய் ஆவேசத்தோடு அரவணைத்துகொண்டு வெள்ளம் பெருக்கெடுக்க... மூன்று இலட்சத்துக்கும் அதிகமானோ அதிகளாகி தன் இடங்களை விட்டு இடம் பெயர்ந்து கோடிக்காணக்கான பொருட்சேதங்களுடன் உயிர் வாழ போராடிக்கொண்டிருக்கின்றார்கள்!?

இலங்கையில் வரும் இழப்புக்கள்,பாதிப்புகள்  இனமதபேதமின்றி அனைத்து மக்களையுமே பாதிக்கும் எனும் நிஜம் புரியாதோராய் அன்று நாங்கள் அழுதபோது எள்ளி நகையாடினீர்களே? இன்று நீங்கள் அனுபவியுங்கள் எனச்சொல்லி அன்றவர்கள் செய்\த தவறினையே இன்று செய்யும் என் இன மக்களின் செயல் பாடுகள் கண்டு என்ன சொல்வது?

இலங்கை தேசத்துக்காய் 

இறைவா நீ வர வேண்டும்

*************************

எல்லோரும் நலம் தானே?

 எல்லோரும் நலம் தானே?

நான் முதல்வரானால் எனும் தலைப்பில்  கவிதைபோட்டி ஒன்றுக்காக  மார்ச் மாதம் எழுதிய எனது பதிவை இங்கும் பகிர்கின்றேன்.

நாளெல்லாம் பாடுபடும் நல்லவர்கள் சொல்கேட்பேன்

நாய் போல் வாலைக்குலைக்கும் வஞ்சகர்க்கஞ்சேன் நாளை நமதாகவே கற்றோர் கரமிணைவேன் கல்லாதோர் வாழிவியலை வரமாய் எடுத்தாள்வேன்! வாலிபர் வளம் தனையே வசமாயாக்கிடுவேன் காயம்தனை துடைக்கும் கரமும் நானாவேன் காணும் இடமெல்லாம் காட்சிப் பொருளாகேன்- எனை தேடும் போதினிலே கண்முன்னே வருவேன்! ஜாதீ,மதம்தனையே தீயில் பொசிக்கிடுவேன் மதுவால் மதமாகும் இழிநிலை அகற்றிடுவேன் பசியெனும் கொடியவனை இல்லாதொ ழித்திடுவேன் யாவரும் ஒன்றே என சட்டம் இயற்றிடுவேன்! கல்வியின் மேன்மைதனை அகமுணர்த்தி விடும் அடியேனாய் நானிருந்தே கற்றலை எளிதாக்குவேன்!  இலவசமெனும் அரக்க இயலாமைதனை நிறுத்தி இல்லாமை ஒழித்திடவே உழைக்கும் வழிகாட்டுவேன்! நாளை நாளையென நாளைக் கடத்தாது . நானல்லஎவரோ என எவரிலும் நாமம் சுமத்தாது தேக்கம் தருவோரை தூரமாய் நிறுத்தி - சொல் வாக்கை நிறைவேற்றிட பாங்காய் பணி புரிவேன்! பேரிடர் வரும் நேரம் பிரிந்தே நிற்காது யாரிடம் செல்வோமென தவிக்க வைக்காது- கால் வாரிடும் துஷ்டரையும் தூணிவாய்ய் துரத்திடுவேன் மனமேவிடும் புதலவனாக உனக்கென நானிருப்பேன்!

எங்கேயும் போகவே இல்லை!

நீ என்னைத்தேடிவருவாய் என

கோயில் வாசலில்

உன்னிடம் யாசிப்பவனாக

காத்திருந்தேன்!

நீயோ

கண்ணை மூடிச்சென்றாய்!

நான்

என்ன செய்யட்டும்

உன் வாழ்க்கை அங்கேயே

மாற்றங்களின்றி....!!!!!!!

இப்படித்தான் கடவுள் புலம்பிட்டு இருப்பதாக கேள்விப்பட்டேன்! நிஜமாக இருக்குமோ?

நேரம்இல்லை என்பவர்களையும்,சூழ்நிலையின் மேல்பழிபோட்டு தப்பித்துக்

கொள்ள நினைப்பவர்களையும் எனக்கு பிடிப்பதே இல்லை  என சொன்னது ஒரு புறமிருக்க,இப்போதெல்லாம் எங்கள் வீட்டு கடிகாரம் வேகமாக ஓடுகின்றதோ என நினைக்கும் படி நேரமும், காலமும் ஓடி போய்க்கொண்டெ இருக்கின்றது.

தூக்கமும் துக்கமும் எது வந்தாலும் அதனதன் நேரம் மட்டும் தான் நினைவில் நிலைக்கின்றது. மீதி நேரம் எல்லாம் அடுத்து என்ன ஆர்டர் ? எங்கே? என்ன பொருட்கள் வாங்க வேண்டும்? எத்தனை மணிக்கு செல்ல வேண்டும்? எத்தனை பேர் வேலைக்கு வேண்டும்  என சிந்தித்து சிந்தித்து  கனவிலும் அதையே சொல்லி புலம்பும் படி ஆகிப்போனது என் நிலை!

ஆற அமர அமர்ந்திருந்து  நான் நலம்! நீங்கள் நலமா? உங்கள் வீட்டார் நலமா? ஆடு மாடு கோழி முதல்  நாய்க்குட்டி வரை நலமா? இன்று என்ன சமையல்? என்னுடையபதிவு படித்தாகி விட்டதா? இப்ப்ப்ப்ப்ப்படி யப்ப்படி கேள்விகளுக்கா பஞ்சம்.ஓரிரு மணி நேரம் அரட்டையில்  ஓடியதெல்லாம் கனவோ என நினைக்கும் படி தம்பி மாரெல்லாம் தூரமாய் போய் விட்டார்கள்! எங்க குமார் உட்பட யாருமே எப்படி அக்கா  இருக்கின்றீர்கள் என கேட்க மறந்து போனதையே நான் மறந்து போனேன்!

அப்பப்ப கில்லர் ஜீ மட்டும் எட்டிப்பார்த்து ம்ம்ம்ம்ம்ம்ம்ம் இட்டு விட்டு சென்றார். அவரின் ம்ம்ம் க்கும் ம்ம் ஒப்புவித்து விட்டதனால் அவரின் புதிய பதிவுக்கு கருத்திடாதது மன்னிக்கப்பட்டிருக்கும் என நம்புகின்றேன்! நான் கருத்து இடுவதற்கிடையில் அவர் இன்னும் நான்கு பதிவு இட்டாலும் இட்டு விடலாம்!

யாருடைய பதிவும் படிக்க முடியவில்லை, படிக்காததால் கருத்தும் இடம் வில்லை? படிக்காமல் எப்படி கருத்திடுவது என  கில்லர்ஜி சார் கேட்பதும் எனக்கு கேட்டு விட்டது! என்ன செய்வது! அத்தனை வேலைப்பளுவில் சிக்கிக்கொண்டேன்! சும்மா இருந்த என்னை வலைப்பூவில் பதிந்திடு அக்கா என இழுத்து வந்த தங்க மனசு குமாரிடம் தான் நீங்கள் நியாயம் கேட்க வேண்டும்!இன்னும் ஒரு வாரத்தில், அல்லது மாதத்தில் நேரம் கிடைக்கும் என  சொல்ல முடியாதவாறு  தொடரும் வேலைகள் நடுவே எதையேனும் படித்தாலும் தட்டச்சிடவோ,கருத்திடவோ சிந்தனைகள் ஒத்துழைப்பதில்லை,

சிந்தனைக்கும் தட்டச்சிடுவதற்கும் என்ன சம்பந்தம் என ரமணி .S ஐயா கேட்டதுகூடஎனக்கு கேட்டு விட்டது!உடல் களைத்தாலும் உள்ளமும்

களைக்கும் தானே? இருந்தாலும்  நேரம் கிடைக்கும் போதெல்லாம் எல்லோர் பதிவையும் படித்து கருத்திடுவேன் என்பது நிச்சயம் என்பதால் நான் வரவில்லை என என்னை மறந்து விடாதீர்கள் அபி ராஜசேகர் மேடம் !

ஆமாம்!  நீ வரவில்லை, படிக்கவில்லை, கருத்திடவில்லை என யார் கேட்டார்கள்  என அவர்கள் உண்மைகள்  மதுரைத்தமிழன் சார்  கேட்டாலும்  சரி, நான் சொல்ல வந்ததை சொல்லி விட்டேன், 

தொடர்கள் முதல் தொடராதவைகள் வரை  அனைத்தையும் தொடர முடியா

மைக்காக வருந்துகின்றேன்.

நான்கு பேரை மட்டும் சொல்லி நம்மையெல்லம கண்டுக்கவே இல்லையே என நீங்கள் யாருமே நினைத்து விடக்கூடாது என்பதனால் தங்கள் கருத்திடலால் என்னை எழுத வைக்கும் உங்கள் அனைவருக்கும் என் இதயத்தில் இடம் தந்து விட்ட இரகசியத்தையும் சொல்லி இன்று விடை பெறுகின்றேன்!

காலமும் நேரமும். கடவுளும் ஒத்துழைத்தால் நாளையே கூட மீண்டும் சந்திப்போம்!

**************************

 படம் இணையத்தில் கிடைத்ததே!

என் பதிவை  தேடி வந்தவர்களுக்காக! 

நான் ரசித்த சர்தர்ஜி  ஜோக்ஸ் சில! சிரிப்பு வந்தால் சிரித்து விடுங்கள்!

நல்ல பசியில் ஓட்டலுக்கு சாப்பிடச் சென்றார் நமது சர்தார்.
சாப்பிட்ட பின் பில்லுக்கான தொகையையும் கட்டிவிட்டார். 

கிளம்பும் முன் சர்வரிடம்சொன்னார், 

"வெள்ளரிக்காயைநறுக்கிகண்களில்வைத்துக்கொண்டால், நீ ரொம்ப
அழகாயிருப்பே,அப்புறம் வெட்டிவேரில் நனைத்த தேங்காய் எண்
ணெயைதலைக்கு தடவினால் உன்தலைமுடியும் கருப்பாகிவிடும்." 
என்று சொல்ல,குழம்பிப்போன சர்வர் கேட்டார்,

 "சார், இதெல்லாம் நீங்க ஏன் எங்கிட்டசொல்றீங்க?"

நம் சர்தார்ஜி சொன்னார், " மக்கு இன்னுமா புரியவில்லை, நான் உனக்கு டிப்ஸ் கொடுத்தேன்"

******************************************************

 வேகமாக காரோட்டியதற்காக சர்தார் தடுத்து நிறுத்தப்பட்டார்.

” அதிக வேகம் 50 கி.மீ ன்னு போட்டிருக்கே பார்க்கலியா..?”

” இல்லையே… 70 ன்னு தானே எல்லா எடத்திலேயும் போட்டிருக்கு..”

” யோவ்… அது Nh 70. இந்த நெடுஞ்சாலையோட பேரு.. சரி பொழைச்சு போ..சிங்குங்கறதாலேசும்மாவிடறேன்.. சரி ஏன் உங்க வீட்டுக்காரம்மா இப்படிபேயறைஞ்சது மாதிரி வியர்த்துப் போய் உக்காந்து இருக்கு..?”

” கொஞ்சம் முன்னாலே Nh 140 லே வந்தேன்… அதான்….”

***************************************************************

எங்கெங்கே நோக்கினும்!

துயில் கலையும் வேளையிலே கண் முன்  நிற்கிறாய் 

காணும் காட்சிகளி லுன் நினைவை தந்து மறைகிறாய் 

ஓசையெல்லா முன் அழைப்பாய் தோன்றிமறையுதே

என் நெஞ்சமதில் தாலாட்டாய் உன் மொழிகளே!

கொஞ்சிக்கெஞ்சி பேசி நீயுமெ ன்னுள் உறைகிறாய் 

வஞ்சி மனம் மஞ்சிடாமல் காத்து  நிற்கிறாய் 

தஞ்சமா யுன் நெஞ்சமதில் ஊஞ்சலாடிடும் 

நங்கையவள் தனை நம்பும்  நம்பியாகின்றாய்!

எண்ண மெல்லாம் வண்ணம் கொண்ட கண்ணனாகியே 

மன்னவனாய் உள்ளுணர்வில்  கலந்து நிலைக்கிறாய்

உன்னவளை கண்மணி போல் காத்திடுவதில் 

யுனக்கு நிகர் நீயோவென மலைக்க வைக்கிறாய்!

நித்தம் எந்தன் நினைவினிலே பித்தனாகிறாய்

சத்தமின்றி சொப்பனத்தில் சொக்கி நிற்கிறாய்

சித்திரம் போல் பத்திரமாய் உந்தன் அணைப்பிலே

பள்ளி கொள்ளும்  பாவையென்னை  பாதுகாக்கிறாய்!

எல்லாமே நீயானாய்!

கரைதெரியாத என் வாழ்வில்
படகோடு நீ வந்தாய்...

இருளான என் வாழ்வில்
ஒளியாக நீ வந்தாய்...

என்னை அமிழ்த்தும் பாரத்தை
தாங்கும் சுமையாக நீ வந்தாய்...

பசியாக நான் இருந்தேன்
பசி போக்கும் தாயானாய்

நோயாலே தவித்திருந்தேன்
நோய் போக்கும் மருந்தானாய்..

தூற்றும் மாந்தர் நடுவினிலே
துயர் துடைக்கும் துணையானாய்

என் சிந்தை சொல் அனைத்தும்
நித்தம் நித்தம் நீயானாய்...

இன்பம் தரும் இறையானாய்
தாங்கிடும் தாயானாய் ,

சுமந்திடும் தந்தையானாய்
தேற்றிடும் உறவானாய்

என் எண்ணமே நீயானாய்
எனக்கெல்லாமே நீயானாய்


2009 ல் எழுதப்பட்டு முத்தமிழ் மன்றம், தமிழ் மன்றம், சேனைத்தமிழ் உலா போன்ற தளங்களில் பகிரப்பட்டது! 

உழைப்பாளி எங்கள் விவசாயி!

உலகம் போற போக்கைப்பாத்து

ஒளிஞ்சி கொண்ட எங்க ஆண்டவரே!

கொஞ்ச மனமிரங்கி எங்கள பாருங்க!

வியர்வை சிந்த மண்ணக்கொத்தி

பசள போட்டு பதப்படுத்தி

வித விதமா விதை விதைச்சி

ஊருக்கெல்லாம்

சோறும் போட்டேங்க!

இப்ப நானு வாழ சோறு கேட்டு

நாயி மாதி அலையிறேனுங்க

நானு செய்த பாவம் என்னங்க?

உயிரக்குடுத்து காடு கழனி

வெட்டிக்கிட்டோமுங்க,

வாயைகட்டி வயித்தக்கட்டி

வீடு ஒண்ணும் கட்டிக்கிட்டோமுங்க!

நாங்க தாங்க படிக்கல்ல

நம்ம புள்ளயாச்சும் படிக்கணுமிண்ணு

ஊரெல்லாம் ஒண்ணு சேர்ந்து

பள்ளிக்கூடமும் கட்டிக்கிட்டோமுங்க!

கோவில் குளம் எல்லாம் கட்டி

கோபுரமும் பெரிசாக்கட்டி

நோய் நொடின்னு வந்திட்டா

வைத்தியரு ஆசுப்பத்திரி

எல்லாமே  இருந்திச்சிங்க.

நாடுதாங்க நமக்கில்ல

வீடாச்சும் இருக்குதேண்ணு

நிம்மதியா தூங்கினேனுங்க!

வயசான காலத்தில ஓய்ஞ்சிருக்க

நினைச்சி நானும் கோட்டை

எல்லாம் கட்டிகிட்டேனுங்க.

இப்ப நம்ம வாழ்வே சிதைஞ்சி போச்சிங்க

வீடும் இல்ல வாசலும் இல்ல

பெண்டு பிள்ளைக படும்பாட

பாத்து நமக்குக்கண்ணீர் வரல்லங்க!

கண்ணீரெல்லாம் வத்திப்போச்சுங்க!

எண்ட ரத்தத்தால நிறஞ்சி போச்சிங்க.

ராசா மாதி இருந்தேனுங்க.

எல்லாமே இருந்திச்சிங்க

இப்ப எல்லாமிருந்தும் ஒண்ணுமில்லாம

நாதியத்துப்போயித்தேனுங்க

நா வறண்டு தவிச்சிப்போய்

நா தினமும் சாகுறேனுங்க. .

நானு செய்த பாவம் என்னங்க?

கல்லுப்போல கிடக்குற ஐயாசாமி

பெரிய சாமி,சின்னச்சாமி 

எல்லாச்சாமியும் ஒண்ணு சேருங்க!

எங்க மேல இரக்கம் காட்டுங்க

சீக்கிரமா வழியக்காட்டுங்க.

நானு நிம்மதியா சாகணுமுங்க.

படங்கள் இணையத்தில் எடுத்தவை!