18 செப்டம்பர் 2017

குறிஞ்சா இலைச்சுண்டலை அறிஞ்சோமா!?



கொடிவகை பெருங்குறிஞ்சா இலைகள்

சிறு குறிஞ்சா,பெருங்குறிஞ்சா என இருவகை இலைகளில் சிறு குறிஞ்சா இலைகள் வெற்றிலை போல இருக்கும். செடி வகைத்தாவரம். Gymnema sylvestre என்றழைக்கப்படும் .சிறுகுறிஞ்சா இலைகள் குடலை சுத்தப்படுத்தும் தன்மை வாய்ந்ததாகவும் நீரழிவு நோயாளர்களை இன்சுலின் எடுப்பதை தவிர்க்க செய்வது என்பதும் அறிவியல் ரிதியில் இன்னும் நிருபிக்கப்படா விட்டாலும் அனுபவத்தில் நீரழிவு நோயாளர்களுக்கு அரு மருந்து என்பதில் ஐயமே இல்லை என்பேன்.

Dregea volubilis எனும் பெயரில் இருக்கும் பெருங்குறிஞ்சா இலை கசப்பாக இருக்கும் இந்த இலை மூலிகைத்தன்மை வாய்ந்தது. இதன் கசப்பும் நீரழிவு நோயாளர்களுக்கு நல்லதென்பர்.


செடிவகை சிறு குறிஞ்சா இலைகள்

இவ்விலைகள் குறித்து தகவல்களை விக்கிமீடியாவிலும் இன்னும் தொகுக்கப்படவில்லை. யார் வேண்டுமானாலும் தொகுக்கலாம், திருத்தலாம் எனும் விதிமுறை விக்கிமீடியா தளத்தின் மீதான நம்பிக்கையை பொய்த்து போக செய்கின்றது. என்றாலும் இயலும் போது இயலுமானோர் அத்தளத்தின் தகவல்கல் பூர்த்தியாக்கப்படுமானால் எதிர்கால சந்ததிகளுக்கு பயன் தருவதாய் இருக்கும்.

சிறு குறிஞ்சா தென்,மத்திய இந்தியா மற்றும் இலங்கையின் வெப்பமண்டலக் காடுகளில்வளரும். இச்செடி தென் இந்தியாவில் அதிகமாக விளைவிக்கப்பட்டு இன்சுலின் தயாரிப்புக்கும் இன்னபிற மருத்துவத்துக்காகவும் மேலை நாடுகளுக்கு ஏற்றுமதி செய்யப்படுகின்றது.

சுவிஸுக்கும் ஏற்றுமதியாகும் இலைகளில் இவ்விலைகளும் இருக்கின்றது. இங்கே எம்மவர் வீட்டுச்சமையலில் குறிஞ்சா இலைக்கும் பங்குண்டு.



                                       பெருங்குறிஞ்சா கொடி இலையின் காய்கள்
பெருங்குறிஞ்சா இலைகளின் காய் முற்றி வெடித்து சிதறுவதனால் காற்றின் மூலம் விதைகள் தானாகவே நிலத்தில் விழுந்து முளைக்கும் தாவரமாகும்.. தடித்த வலிமையான இலைகளோடுவேலியிலோ, முருங்கை போன்ற கிளைகள் கொண்ட பெரிய மரங்களிலோ பந்தல் இட்டோ வளரும் கொடி வகை தாவரம். இது.
                                       
படர்ந்திருக்கும் கொடி இலைகள்
கொடியில் படரும் பெருங்குறிஞ்சா இலைகளை ஒவ்வொரு இலையாக பறித்து , அதன் காம்பை கிள்ளி தண்ணீர் விட்டு கழுவி, தண்ணீர் இல்லாமல் துடைத்து பத்து பதினைந்து இலைகளை ஒன்றின் மேல் ஒன்றை வைத்து அடுக்கி சுருட்டு போல் சுருட்டி நடுவில் பாதியாக்கி இடது கையில் பிடித்து கொண்டு வலது கையில் கூரான் பிளேட்டினால் அல்லது சின்ன கத்தியால் மிக மெல்லியதாக சீவி எடுப்பார் அம்மா. அப்போதெல்லாம் எங்கள் ஊரில் வாரத்துக்கு ஒரு தடவையேனும் குறிஞ்சா இலை சுண்டல் எனும் பொரியல் இருக்கும்,

குறிஞ்சா கீரை சுண்டலின் விஷேசமே அந்த கீரையை நாங்கள் மிக மெல்லியதாக அரிந்து எடுப்பதில் தான் இருக்கின்றது. சிலர் காய்கள் கட் செய்யும் பலகையில் வைத்தும் அரிவார்கள். ஆனால் எங்கம்மா, பக்கத்து வீட்டு அக்காக்கள், ஏன் என் தங்கைகள், தங்கை மாமியார் எல்லாம் இப்படி இடது கட்டைவிரல் சுட்டுவிரல் பிடிக்குள் பிடித்துக் கொண்டு வலது கையால் வெட்டும் வேகம் பார்த்து அதிசயித்திருக்கின்றேன்.

எனக்கு குறிஞ்சா கீரை சாப்பிட நிரம்பவே பிடிக்கும், சுடச்சுட சோறும், இந்த கீரை சுண்டலும் ஏதேனும் மீன் பொரியலும் சின்ன வெங்காயம் பச்சையாக இரண்டும் கிடைத்தால் போதும். வேறு கறியோ கூட்டோ வேண்டாம், எனக்கு இக்கீரையினை அரிந்தெடுக்கும் பொறுமை இல்லாததனால் இங்கே கடைகளில் கிடைத்தாலும் வாங்குவதில்லை. எந்தங்கை அடிக்கடி குறிஞ்சாகீரை சுண்டல் செய்வாள்.

மட்டக்களப்பில் அதுவும் பெரியகல்லாற்றுச்சாப்பாட்டுக்கென தனி கைமணமும் பக்குவமும் உண்டு.. அந்த ஊர் கிணற்று நீரின் சுவையும் அவ்வூர் சமையலை ருசியாக்குகின்றதெனில் மிகையில்லை. அத்தோடு ஜாதி,மதம்,இனம்,அந்தஸ்து,தகுதி, தரம் பார்க்காது அறிந்தவர், அறியாதோர் என்றில்லாமல் வீட்டுவாசலுக்கு வரும் எவரையும் விருந்தோம்பி அனுப்பும் குணமும், உபசரிப்பும் அன்பும் கூட கல்லாற்றுச் சாப்பாடு சுவைக்க அதிக முக்கிய காரணங்களாக இருக்கின்றது..

இலங்கை உணவில் கிழக்கு மாகாணம் அதிலும் மட்டக்களப்பு விருந்தோம்பலுக்கும், உணவின் சுவைக்கும் பெயர் போனது. இதை அக்காலத்தில் வடக்கிலிருந்து கிழக்குக்கு வேலை மாற்றம் பெற்றோ ஏதேனும் தேவைக்காகவோ பயணம் செய்யும் ஆண்களை மாந்தீரிகம் செய்து மயக்குவதாகவோ, பாயோடு ஒட்டும் படி மருந்து வைப்பதாகவோ சொல்வார்களாம். மட்டக்களப்புக்கு செல்லும் ஆண்களும் பெரும்பாலும் அங்கேயே பெண் எடுத்து வாழ்க்கையில் செட்டிலாகி விடுவதும் இக்கதைகளை நிஜங்களாக்கினாலும் உண்மைக்காரணமாய் உபசரிப்பும் விருந்தோம்பலும், உணவின் சுவையும் தான் அடிப்படைக்காரணங்களாய் இருந்திருக்கின்றது. இருக்கின்றது.

குறிஞ்சா கீரை சுண்டல் செய்வது எப்படி என பார்க்கலாமா?
குறிஞ்சா இலைகள் பத்து
ஒரு கைப்பிடி தேங்காப்பூ
ஐந்து பச்சை மிளகாய்
20 சின்ன வெங்காயம் தோல் உரித்து மெல்லியதாக நறுக்கிக்கொள்ள வேண்டும்.
மஞ்சள், உப்பு
நான் வெஜ் சாப்பிடுபவர்கள் எனில் மீன் துண்டுகள் சேர்க்கலாம். வெஜ் எனில் சேர்க்காமல் விடலாம்,

எப்படி சமைக்கலாம்?
குறிஞ்சா கீரையை மேலே சொன்னபடி கழுவி துடைத்து அரிந்து எடுத்து கொள்ள வேண்டும்

பச்சைமிளகாயை நடுவில் கட் செய்து இரண்டாக்கி கொஞ்சம் நீர் விட்டு பாத்திரத்தில் போட்டு மஞ்சள் துளியும் உப்பும் சேர்த்து அவிய விட வேண்டும். பாத்திரத்தினை மூடி அவித்தால் மஞ்சள் வாசனை கீரையில் சேராது.

மீன் சேர்ப்பது எனில் மீனையும் கழுவி துண்டாக்கி பச்சை மிளகாய் சட்டிக்குள் போட்டு அவித்து கொள்ள வேண்டும். மீன் அவிந்ததும் தனியே பிரித்து அதன் முட்களை நீக்கி உதிர்த்து கொள்ள வேண்டும்.

பச்சை மிளகாய் அவிந்ததும் கரண்டி கொண்டு கடைந்து விட்டு வெஜ் கீரை சுண்டல் செய்ய விரும்புவோர்.. சூரிய காந்தி எண்ணெய் அல்லது தேங்காய் எண்ணெய் கொஞ்சம் விட்டு அதனுள் கீரையை இட்டு கிளறி விட்டு உடனே தேங்காய்ப்பூவை சேர்த்து இரண்டு மூன்று தடவை கீரையுடன் கலந்து தேங்காய்ப்பூ சுண்டியதும் வெங்காயத்தினை சேர்த்து பாதி வெந்த பருவத்தில் ஒரே நிமிடத்தில் அடுப்பை விட்டு இறக்கி விட வேண்டும்.வெங்காயம் நன்கு அவியக்கூடாது. வெந்தும் வேகாமலும் பல்லில் கடி பட வேண்டும். அப்போது தான் கீரைச்சுண்டலே சுவையாக இருக்கும்,

குறிஞ்சா கீரை அதிகம் வேக விட்டால் கசப்பு அதிகமாகும், கீரை போடும் போது பாத்திரத்தில் தண்ணீரும் இருக்க கூடாது. பச்சை மிளகாய் அவித்து கடைந்ததும் அதன் நீர் வற்றி விட்டதா என கவனித்து கீரையை போட்டு கிளறவும். இவ்வகை கீரை சுண்டலுக்கு நீர் இருந்தால் அதிக கசப்புத்தன்மை இருக்கும், தேவையான அளவு உப்பும் சேர்த்தால் போதும், 

மீன் சேர்ப்பவர்கள் பச்சைமிளகாய் கடைந்தது முள் இல்லாமல் உதிரியாக இருக்கும் மீனை போட்டு கிளறி அதன் பின் மேலே சொன்ன முறையில் கீரை, வெங்காயம், தேங்காய்ப்பூ சேர்த்து கிளறி இறக்க வேண்டும்..

சுடச்சுட சோறும் கீரை சுண்டலும் உடலுக்கும் நல்ல ஆரோக்கியமாய் நோய் நொடி அண்ட விடாமல் வாய்க்கும் உருசியாய் கிடைத்த அருமந்த உணவுகளை விட்டு நாங்கள் நெடுந்தொலைவு வந்து விட்டோம்.

கீரைகள் சமைக்கும் போது என் பிள்ளைகளுக்கும் கொடுத்து பழக்கி இருப்பதனால் இன்னும் எங்கள் வீட்டில் கீரைக்கறிகளுக்கு இடம் உண்டு.

குறிஞ்சா இலைப்படங்கள் இணையத்தில் இருந்தே எடுத்து பகிர்ந்துள்ளேன்.

இந்தப்பக்கம் வந்து படிப்பவர்கள் உங்கள் கருத்துக்களை இட்டால் நானும் தொடர்ந்து எழுதும் உயிப்பூவை பெறுவேன் அல்லவா?

17 செப்டம்பர் 2017

வெந்தயக்குழம்பும் அம்மம்மாவும்

செவ்வாயும் வெள்ளியும் விரதம்!
மரக்கறிதான் சாப்பிடணும்,
சின்ன வெங்காயத்தை தோலுரித்து பொடியாக நறுக்கி கொஞ்சூண்டு தேங்காய்எண்ணெய் விட்டு வதக்கி வெந்தயம் தூவி புளிக்கரைசலைவும் கொச்சிக்காத்தூளுடன்   உப்பும் போட்டு ஒரு கிண்டு கிண்டி விடுவா.அம்மாடியோவ்.. இன்னும் கொஞ்சம் சோறு தா என நாலு தட்டு சோறு தின்னுவோம் வெந்தயக்குழம்பு அன்னிக்கு முழுக்க கையில் வாசனையோட இருக்கும்.
அப்படியே வேலி ஓரத்தில் நிற்கும் தூதுவளையில் இரண்டு கைப்பிடி பிடுங்கி சோத்துப்பானையில் கஞ்சி வடிச்சி அந்த சூடு சோத்துக்கு மேல் வாழையிலையை போட்டு அதுக்கு மேல் தூதுவளையையும் பச்சைமிளகாய் நாலையும் வைச்சு மூடி வைச்சிருவா. எரியும் விறகை அணைச்சி தணலில் வேக விட்டால் பத்து நிமிடத்தில் தூதுவளையை பச்சைமிளகாயுடன் சின்ன வெங்காயம் ஒரு பிடி தேங்காப்பூ வைச்சி அம்மியில் அரைச்செடுத்தால்....சுடச்சுட சோறும் தூதுவளை பச்சடியுமாய் அமர்க்களம் தான்.
அம்மம்மா கைச்சமையல் ஒருவிதம் என்றால் அம்மா சமையல் இன்னொரு விதம். எதை செய்தாலும் அன்பையும் அக்கறையையும் அள்ளி சமைப்பார்கள் என்பதனால் ருசியும் தனி.
சின்ன வெங்காயம் சின்ன சீரகம் தாளிச்சு தேங்காய்ப்பூ போட்டு அரைச்சி எடுக்கும் சட்னியும் தோசையும் எங்கம்மா சுட்டால் ஊருக்கே வாசனைவரும். அப்படி ஒரு ருசி எங்கேயும் சாப்பிட கிடைக்கவே இல்லை.
அப்பல்லாம் தூதுவளை பச்சடி,, கறிவேப்பிலை துளிரில் பச்சடி, முருங்கைக்கீரை துளிர் பச்சடி குறிஞ்சா கீரை சுண்டல், கானாந்தி முல்லை லெச்சகட்டை கீரைக்குள் புளி மாங்காயும் கீரி மீனும் போட்டு சொதி என எளிய உணவு தான், வீட்டு ஓரத்தில் வேலியில் வளரும் கீரைகளை கொண்டே சமைப்பார்கள்.
கெழுத்தி மீன் புளிமாங்காய் உப்பவியல்
கூனியும் புளிமாங்காயும் கடையல்
சள்ளல் மீன் மிளகு தண்ணீர்
ஆத்தில் பிடிக்கும் செல்வமீன் உப்பவியலோ பொரியலோ பசித்து ரசித்து ருசித்து  வசித்தோம். 

16 வயதில் சுவிஸுக்கு வந்து 13 வருடம் கழிச்சு 29வயதில் ஊருக்கு போய் ஊர் நினைவில் ஊர்ச்சாப்பாட்டை தேடினேன்.
எல்லாமே தொலைந்து போயிருந்தது. தொலைந்து தொலைவாய் நானும் போயிருந்தேன்.
எங்கே தேடியும் கிடைக்காத இனி என்றும் கிடைக்கவே கிடைக்காத பொக்கிசநினைவுகள் இனிமையானவை

28 ஆகஸ்ட் 2017

உணர்வற்று போன பின்???

எங்கள் கலாச்சாரத்தின் படி பெற்றவர்கள் பிள்ளைகளை தாங்கியே நம்பியே வாழும் சூழலில் இக்கால இளையோரிடம் இருகுடும்பத்தினையும் அனுசரித்து செல்லுதல் என்பது குறைந்து திருமணம் எனில் தாங்கள் இருவர் மட்டுமே எனும் புரிதல் அதிகமாகி, வேற்றுமைகள்,பிரச்சனைகள் என சரியான புரிதல்கள் இன்றி பெரியோரை தூரமாய் நிறுத்தி தனக்கு எல்லாம் தெரியும், தன்னால் எல்லாம் சமாளிக்க முடியும் என அகந்தை கொண்ட மனமும், சரியான் புரிதலின்மையும், வழிகாட்டுதல் இன்றியும் தவறான நபர்களின் ஆலோசனையுமாக சீர்குலையும் குடும்பங்கள் தற்காலத்தில் அதிகமாகி... பிரச்சனைகளை எதிர் நோக்க தன்னம்பிக்கையற்று தற்கொலையை நாடிச்செல்லும் சூழல் அதிகரித்து வரும் இன்றைய சூழலில்

நமக்குப்பின் நம்மை நம்பி இருப்போர் நிலை குறித்து என்றேனும் சிந்தித்திருக்கின்றோமா?

வீட்டின் ஆண் மகனாய் பிறந்து தாயின் அரவணைப்பில் வளர்ந்து திருமணமானபின் மனைவி, தாய் என வரும் சூழலில் இருவரையும் ஒரே தராசில் நிலைக்க வைக்க முடியாதவர்கள் தங்கள் இல்லாமை, இயலாமை நேரம் தன்னை நம்பி இருக்கும் தாய், தகப்பன், சகோதரர்கள், உற்றார்,உறவினர் நிலை குறித்து என்றேனும் சிந்தித்திருக்கின்றீர்களா?
கடவுள் சட்டப்படி தாயையும், தகப்பனையும் அசட்டை பண்ணாமல் அவர்களுக்கான கடமையை நிறைவேற்றி, மனைவியாளவளுக்குரியதையும் சரியாக செய்ய வேண்டும் என்றிருந்தாலும் ஒரு ஆண்மகனுக்கு மனைவி எனும் பந்தம் இடையில் வந்திருந்தாலும் அவனுக்குரிய அனைத்து ஆளுமைகளையும் உலகச்சட்டத்தின் படி மனைவிக்கே எனும் சாதகமிருப்பதும் பெண்களுக்கான பாதுகாப்பு சட்டங்களையும் பயன் படுத்திடும் வாய்ப்பு கிடைக்கின்றது.
ஆனால்........?
ஒரு ஆண் தாயின் கர்ப்பந்திலில்ருந்து பிறந்து வளர்ந்து 25 தொடக்கம் 30 வருடங்கள் பெற்றோரால் வளர்க்கப்பட்டு, நேசிக்கப்பட்டு திருமணம் எனும் பந்தத்தின் மூலம் முழு உரிமையும் மனைவிக்கு தாரை வார்க்கப்ப்ட்ட பின் வாழும் காலத்திலேயே அவனால் மனைவியையும் சொந்தக்குடும்பத்தினையும் சமாளிக்க முடியாத போது அவன் இல்லாத நிலையில் அவனை நம்பி இருக்கும் அவன் தாய் தகப்பன் நிலை என்ன ஆகும் என்றேனும் யோசித்திருக்கின்றீர்களா?
நாளை என்ன இன்றே அடுத்த நிமிடம் என்ன நடக்கும் என்பதை நாமறியோம் எனும் நிலையில் உங்களுக்கான எதிர்காலம் குறித்து மட்டுமல்ல நீங்கள் இல்லாத வாழ்க்கையை தைரியமாக உங்களைச்சார்ந்தவர்களும் எதிர் கொள்ள திராணியுள்ளவர்களாகும் படி திட்டமிடுங்கள்.
வீட்டுக்கு ஒரு பையனாயிருந்தால் நீங்கள் மட்டுமே உங்கள் பெற்றோருக்கான ஊன்று கோலாயிருக்க முடியும்,. இறப்பும், பிறப்பும் இயற்கையின் படைப்பில் இன்றியமையாது போனது. இழப்பினை ஈடுகட்ட எவராலும் இயலாது.
இழப்பு என்பது இறப்பு மட்டும் அல்ல.உணர்வற்று உயிர் உசலாடும்  நிலை, நோயுற்று உடல் அங்கங்கள் செயலற்று போகும் நிலை என இல்லாமை இயலாமை   ஆக்ரமிக்கலாம்.
இழப்பின் நேரம் உடல், உள ஆரோக்கியம் சார்ந்து சொந்தபந்தங்கள் துணை நின்றாலும் பொருளாதார ரிதியாக உங்களை நம்பி இருக்கும் உள்ளங்கள் மிகவும் பாதிக்கப்படுகின்றார்கள்.
சொந்தமும் போய் சொத்தும் போய் நடுவீதியில் நிற்கும் நிலை ஏன்?
வாழும் காலத்தில் இன்னாருக்கு இது என முடிவெடுத்து அனைத்தினையும் எழுத்தில் எழுதி வையுங்கள். எழுத்தில் எழுதுவதை சம்பந்தப்ப்ட்டவர்களுக்கும் அறிவியுங்கள்.
உலகத்து சட்டங்கள் உங்கள் உடல் முதல் சொத்து வரை அனைத்தும் மனைவிக்கு மட்டுமே முதல் உரிமை என சொல்லி செல்லும் போது உங்கள் இல்லாமை மனதை அழுத்த உடலையேனும் உரிமையாய் தொட்டு தடவ , கண்ணீர் விட்டு கதறி அழ , கடைசி நிமிடங்கள் உங்களோடு கழிக்க உங்கள் மனைவியை கெஞ்சி கேட்கும் நிலையும் வரும்.
மனைவி அனுமதிக்காவிட்டால்????
பாதியில் வந்த சொந்தம் ஆதியில் தொடரும் பந்தத்தை கதறிடிக்கும் அவலமான நிலை வரலாமா?
முன்னொரு காலத்தில் திருமணம் என்பது ஆயுள் பந்தமாயிருந்தது தான். ஆனால் இன்றைய உலகமயமாக்கலில் எதுவுமே நிலையானதில்லை.
கணவனோ மனைவியோ இழப்பின் பின் காலம் முழுக்க நினைத்து கண்ணீர் விடும் சூழலும் இப்போதில்லை. கலங்கி நிற்பதுவ்ம் இல்லை. குழந்தைகளை கூட தூக்கி போட்டு விட்டு தனக்கென ஒரு வாழ்க்கை தேடி அடுத்த சில வருடங்களில் செல்லலாம். இயந்திர உலகில் அன்பும் வற்றித்தான் போனது. காலத்துக்கு ஏற்ப திட்டமிடுங்கள்.
நேசிப்பும் யாசிப்பும் தூசிக்கப்படும் காலம் இது. 
வாழும் வாழ்க்கையில் நீங்கள் எதை விதைக்கின்றீர்களோ அதை மட்டுமே விளைவிக்க முடியும், விதை ஒன்று போட்டால் மரம் ஒன்றாய் முளைக்கவே முளைக்காது.

திருமணம் என்றாலே அவன் சொந்ததாயையும் தகப்பனையும் மொத்தமாக விட்டு விலகி அதாவது அதுவரையான ஆசாபாசங்கள், சொந்த பந்தங்கள் அனைத்தினையும் கழுவி போட்டு விட்டு மனைவிக்கு மட்டுமே சொந்தம் எனும் கையறு நிலை தான் இங்கே பல ஆண்களுக்கு வரமாகி இருக்கின்றது.

அதே போல் பெற்றோர் சரியான புரிதலுள்ளவர்களாக மகனின் மனைவியை 
மறுமகளாக நேசிக்காவிட்டால் கணவன் இழப்பின் பின் உங்களை மட்டுமே நம்பி வந்த மனைவி அவர்களினால் துன்பப்படும் சூழலும் விலக்கி வைக்கப்படும் நிலையும் கைவிடப்பட்டு அனாதரவான வாழ்க்கைக்குள்ளும் தள்ளப்படலாம்.

இவ்விடயத்தில் மேலைத்தேய நாட்டினர் மிகத்தெளிவாக திட்டமிடுவார்கள். தங்களுக்கு பின் யார் எப்படி நடத்தப்பட வேண்டும் என்பதை சிக்கலாக்கி கொள்ள மாட்டார்கள்.
ஆனால் நாங்கள்?/
சிந்தியுங்கள்...! நெருப்பென்றால் வாய் வெந்து விடாது.

என்னைவிட்டால் யாருமில்லை!

தன்னை விட்டால் யாருமில்லை, தான் மட்டுமே அனைத்தும் அறிந்த அறிவாளி, இவ்வுலகில் தன்னைப்போல் புத்திஜீவிகள் இல்லை என இறுமாப்பாய் சக மனிதரை துச்சமாய் நினைப்பவர்களையும் புறம் பேசி அகம் குதறும் ஓநாய்களையும் இனம் காண முடியாதிருப்பதேன்?
தன் நாவினால் முகஸ்துதி பேசுகிறவனைப்பார்க்கிலும், கடிந்துகொள்ளுகிறவன் நம் மேல் அதிக அக்கறை கொண்டவனாயிருப்பான் என உணர முடியாதிருப்பதேன்?
துர்க்கிரியைகளுக்குத் தக்க தண்டனை சீக்கிரமாய் நடவாதபடியால், மனிதரின் இருதயம் பொல்லாப்பைச் செய்ய துணிகரங்கொண்டிருக்கிறது. ஆனாலும் எல்லாக்காரியத்துக்கும் காலமும் நியாயமும் உண்டு;
இன்னது சம்பவிக்கும் என்று மனிதன அறியானே; அது இன்னவிதமாய்ச் சம்பவிக்கும் என்று மனிதனுக்கு சொல்லத்தக்கவர் யார்?
பாவி நூறுதரம் பொல்லாப்பை செய்து நீடித்து வாழ்ந்தாலும் என்ன?
உத்தமனாய் நடக்கிறவன் இரட்சிக்கப்படுவான்; மாறுபாடான இருவழியில் நடக்கிறவனோ அவற்றில் ஒன்றிலே விழுவான்.
கர்த்தருக்கு முன்பாகமாத்திரமல்ல, மனுஷருக்கு முன்பாகவும் யோக்கியமானவைகளைச் செய்ய நாடுங்கள். 2 கொரிந்தியர் 8:21

ஊமையனுக்காகவும் திக்கற்றவர்களெல்லாருடைய நியாயத்துக்காகவும் உன் வாயைத் திற -நீதிமொழிகள்.31:8

ஏழையாயிருக்கிறான் என்று ஏழையைக் கொள்ளையிடாதே; சிறுமையானவனை நியாயஸ்தலத்தில் உபத்திரவப்படுத்தாதே. -நீதிமொழிகள்.22:22
சமீபத்திய நிகழ்வுகளும் மனித மனங்களின்  மாறாட்டங்களும் அதனால் ஏற்பட்ட இழப்பின் வலிகளினாலும் என் எழுத்துக்களிலும்  அவை எதிரொலிக்கின்றதென்பேன். கொஞ்சம் பொறுத்திருங்கள். காலம் அனைத்துக்கும் மருந்தானால்  அனைத்திலிருந்தும் மீண்டும் வருவேன். 





13 ஆகஸ்ட் 2017

கடைசி வரை யாரோ?

உள்ளதை உள்ள படி
நடந்ததை நடந்த படி 
கடந்தவை கடந்த படி
உணர்ந்ததை உணர்ந்து படி

இன்று நடப்பவை யாருக்கோ எவருக்கோ தானே என கடந்தபடி செல்லும் நாம் அப்படிகளை தாண்டும் சூழலுக்குள் தள்ளப்படுவோம் என்பதை உணர்ந்தே கடப்போம்.
நாம் வாழும் காலத்தில் நம நலனில் அக்கறை காட்டி புத்திமதி சொல்பவர்களை தூரமாய் நிறுத்தி நமக்குத்தேவையில்லாதவர்களாகி ஒதுக்கி அவர்களின் திட்டலுக்கும் குட்டலுக்கும் பின்னிருக்கும் ஆழ்ந்த அன்பை உணராமல் சட்டென கோபம் கொண்டு விலகிச்சென்று விடுகின்றோம்.
குறைகள் சொல்லாத, போலித்தனமானவர்களை உண்மை நட்பென நம்பி உயர்த்தி மதிப்பளிக்கின்றோம்.
சூழ்நிலைகள் எங்கே எவருக்கு சாதக. பாதமாகும் என எவராலும் நிச்சயித்திட முடியாது.
விதியை மதியால் வெல்ல நினைப்பதும், எதிர்காலக்கனவுகளைக்குறித்த திட்டமிடலும், என்னாலே எல்லாம்முடியும் எனும் செருக்குடனும், 
நாமும் துன்பப்பட்டு, அடுத்தவரையும் துன்பப்படுத்தாமல் நல்லதை நினைப்போம், நல்லதை செய்வோம்.

நட்பெனப்படுவதும், உறவெனப்படுவதும் உள்ளதை உள்ளபடி உள்வாங்கி கண்டு கொள்ளாமல் செல்வது அல்ல. நன்மை, தீமை உணர்ந்தி வழி காட்டுவதே!
இவ்வுலக வாழ்வெனப்படுவது நீண்ட தூர ரயில் பயணமே! நிலையான தரிப்பிடம் நமக்கு இங்கே இல்லை. நிர்வாணியாய் வந்தோம், நிர்வாணியாய் செல்வோம், நாம் செல்லும் போது நாம் ஓடி ஓடி சேர்த்த பொன் பொருள் எதுவும் நம்முடன் வரப்போவதே இல்லை.
எத்தனையோ திட்டங்களை தீட்டுகின்றோமே.. மரித்தபின் என்னாவோம் என யோசித்திருக்கின்றோமா?
நான் எனும் அகந்தை அழிந்து அதுவானபின் என்னவாவோம்?
சுயமில்லாமல் உணர்வற்று உயிர் வற்றி போனபின்னரான சூழலை எதிர்கொள்ளும் படியாக நம்மை சார்ந்து நம்பியிருப்போரைக்குறித்து சிந்தித்திருக்கின்றோமா? .
  • ஒரு மரணம், தாய், தாரமிருந்தும் அனாதைப்பிணமாக எரிக்க அரசு முடிவெடுத்ததாக அறிந்த   தாயின் கதறலையும் தாய் மாமன் பதறலையும் அருகிலிருந்து உணர்ந்து இறுதிக்கிரியைகளை செய்யவேணும் அவன் உடலை பெற்றுக்கொடுங்களேன் எனும் இறைஞ்சி நின்ற போது  மொழி புரியாமல்  புலம்பெயர் எங்கள் இனம் படும் பாடுகள் கண்டு என் மனம் துடித்தது..சடலத்தினை வைத்து வேட்டையாடும் மனிதர் குணம் கண்டு அதிர்ந்தே அடங்கியது.
  • இறுதிச்சடங்கை  செய்ய அவன் உடலை பெற்று அவனை அதற்கான வாகனத்தில் அனுப்பும் வரை நாங்கள் அலைந்த அலைச்சலும் பாடுகளும் எனக்குள் மிகப்பெரிய தாக்கத்தினை தந்திருக்கின்றது.  என்ன தான் காசு பணம் சேர்த்து வைத்தாலும் கடைசி நேரம் துணை வரவும், துணாய் நிற்கவும் நான்கு மனிதரையேனும் நாம் சேர்த்து வைக்க வேண்டும். 
நாங்கள்குடும்பமாய் வருடத்துக்கு ஒரு வாரம் சேர்ந்து நான்கு பேரும் இத்தாலி செல்ல விடுமுறைப்பயணம் திட்டமிட்டிருந்தோம், பயணத்திட்டத்துக்கு முதல் நாள் நதியில் கண்டெடுத்த சடலத்தினை உறுதிப்படுத்த டீ,என்ஏ டெஸ்டுக்காக தாயை அழைத்த போதே புரிந்து கொண்டேன். (நாங்கள் இங்கே  மொழிபெயர்ப்பு மற்றும் உதவிகள் செய்வோம், சர்ச் ரிதியிலான ஊழியம் கடந்த இருபது ஆண்டுகளாக இனமதம் மொழி பாராது அர்த்த இராத்திரியானாலும் பிரச்சனை உதவுங்கள் என கேட்பவர்களுக்கு உதவி செய்கின்றோம்). அதன் பின் பயணத்திட்டம் கைவிடப்பட்டு பிள்ளைகளும் சரியாக புரித்துணர்வோடுஒத்துழைத்து இவ்வருடம் இல்லாவிட்டால் என்ன அடுத்த வருடம் செல்வோம் என பேசி இங்கே இருந்து அனைத்தையும் ஒழுங்கு செய்து இன்னும் அதற்காக காரியங்கள் முடியவில்லை.. உண்மையில் நாங்கள் இத்தாலி புறப்பட்ட பின் இப்படி செய்தி அறிந்திருந்தால் அந்த தாயின் நிலை குறித்து எங்களால் நினைக்கவே முடியவில்லை. ஏன் எனில் அவர் நீரழிவு நோயினால் பாதிக்கப்ட்டு இரு கால்களும்  நடக்க முடியாத நிலையில் இருக்கின்றார். இத்தாலி பயணத்திட்டம் ஒரு மாதம் முன் ஆரம்பித்தும் நான் ஹோட்டல் ஏதும் புக் செய்யாமல் போகும் முதல் நாள்  போன் செய்து  புக் செய்வோம் என தள்ளிப்போட்டதும்   காரணத்தோடு தான் என்றானது. 

இந்த உணர்விலிருந்து சீக்கிரம் மீண்டு வர வேண்டும் என நினைத்தாலும் தொடரும் காரியங்கள் அது எளிதானதலல் என்றே உணர்த்தி நிற்கின்றது. பார்க்கலாம். யார் பதிவும் படிக்கவில்லை, மனசு சேன்ஞ் ஆக எதிர்பார்த்து அவ்வப்போது பேஸ்புக்கில் அமர்வதோடு சரி

மரணத்தின் பின் சடலத்தை வைத்து  அலைந்த அலைச்சல்களின் தாக்கத்தினால் என் மன உணர்வுகளை அந்த நொடியே கண்ணீர் அஞ்சலி ஆக்கினேன்.  
 

12 ஆகஸ்ட் 2017

நிஷாவின் அனுபவ மொழிகள்.

 வீடுகட்டுகிறவர்கள் ஆகாதென்று தள்ளின கல்லே, மூலைக்குத் தலைக்கல்லாயிற்று. (சங்கீதம் 118:22,23).
உண்மையான வார்த்தை.
நம்மால் வேண்டாம், தேவையில்லை என ஒதுக்கப்பட்டவர்களே நமக்கு முக்கியமானவர்களாக போகும் காலமும் வரும்.
நமக்கு தேவையில்லை என நம்மால் ஒதுக்கப்பட்டவர்கள் நம் மரணத்தின் இழப்பை எண்ணி துடிப்பவர்களாக இருப்பார்கள்.
நம்மால் உயர்த்தப்படுகின்றவர்களினாலேயே நாங்கள் தாழ்த்தப்படுவோம். அழிக்கவும் படுவோம்
நாம் வாழும் காலத்தில் நமக்கு முக்கியமானவர்கள் என மதித்து நடக்கும் எவரும் நாம் தாழும் காலத்தில் எம்முடன் துணை வருவதில்லை.
நாம் வளமாய் வாழ்ந்த காலத்தில் நாம் வேண்டாம் என ஒதுக்கி நடத்துபவர்களே நம் துயர நேரத்தில் துணை வருகின்றார்கள்.
நாம் யாரையெல்லாம் வேண்டாம் என ஒதுக்குகின்றோமோ அவர்கள் நமக்காக கண்ணீர் சிந்துகின்றவர்களாகவும், உதவி செய்பவர்களாகும் இருப்பார்கள்.
நாம் தாழ்த்துகின்றவர்கள் நம்மை உயர்த்துகின்றவர்களாக இருப்பார்கள்.
ஒருவரை திருப்திப்படுத்த இன்னொருவரை பகைப்பதும், வெறுப்பதும், ஒதுக்குவதும் நமக்கு நாமே வைக்கும் கொள்ளி.
மக்கள் கூடி இருக்கும் சபையில் ஒருவரை கனப்படுத்தும் போது அவர்கள் அதற்கு தகுதியானவரா என்பதை ஆராய்ந்து எவரையும் புகழாமலும் இகழாமலும் எல்லோருடனும் ஒரே சம மன நிலையில் நடப்பது எக்காலத்திலும் சிறந்தது.
 

12 ஜூலை 2017

புலம் பெயர் வாழ்க்கையின் நிதர்சனம்

 புலம் பெயர் வாழ்க்கையின் நிதர்சனம்
***************************************************
புலம்பெயர் அகதி வாழ்வை சொர்க்கமாய் நினைத்து தாய் தகப்பன் அணைப்புக்குள் கவலையின்றி பட்டாம் பூச்சிகளாய் பறந்து திரிந்து நாட்டின் பிரச்சனைகளாலும், உயிராசுறுத்தல்களாலும், பகட்டுஆடம்பர வெளி நாட்டு மோகத்தாலும், இருக்கும் வீட்டை வித்து நகை நட்டை அடவு வைத்து சொர்க்கம் தேடும் இளையோர் வாழ்க்கை ஐரோப்பிய நாட்டினுள் காலடி எடுத்த வைத்த சில வருடங்கள் நரகமாகவே காட்சி அழிக்கும்.
ஆடம்பர அகம்பாவ சுபாவங்களுடன், பிரச்சனைகள், பொறுப்புக்கள் ஏதுமில்லாமல் அப்பா அம்மா சேர்த்து வைத்ததில் ஊர் சுற்றித்திரிவோராய் தேவைக்கு மேல் நான்கு ஐந்து போன் வைத்து தங்களை அரண்மனை வாசிகளாக காட்டிக்கொள்ளும் ஒரு சிலரால் உண்மையாக பாதிக்கப்பட்டு இள வயதில் சுமைதாங்கியாகுவோரும் விமர்சிக்கப்படுகின்றார்கள்.
சொகுசு வாழ்க்கை தேடி வேலை செய்ய விருப்பமில்லாமல் அரச உதவியில் பீரில் குளித்து பாலில் மூழ்கி மனம் போன போக்கில் வாழும் பலரால் உண்மைத்தேவையுடன் தவிக்கும் சிலர் பாதிக்கப்படுகின்றார்கள்
அகதியாக நுழைந்த நாட்டில் மொழிபுரியாது, காம்ப் பெடியள் என கேலியும் கிண்டலுமாக ஒதுக்கப்பட்டு, பரிதாபப்பார்வையோடு தாங்கள் மட்டும் வானத்திலிருந்து குதித்த தேவர்களாக தம்மை எண்ணி டாம்பீகம் காட்டும் பழைய புலம் பெயர் வாசிகளின் அசட்டைகளை தாங்கி, அரசு கொடுக்கும் சொற்ப பணத்தில் உண்டு உடுத்து அதிலும் சேமித்து நாட்டில் தம்மை நம்பி வாழும் தாய் தமக்கை தங்கைக்கும் அனுப்பி,,, அவர்களையும் வாழ வைத்து,,, வாங்கிய கடனுக்கும் அடவு வைத்த வீடு, நகைக்கும் வட்டி குட்டி போடுவதை நினைத்தும் தன்னை நம்பி திருமணக்கனவோடு காத்திருக்கும் அக்கா தங்கைகளை நினைத்தும் வழி அறியாது தவிப்போராய் வாழும் வாழ்க்கையின் நிதர்சனம் புரியாது கடன் பட்டேனும் தாய் நாட்டை விட்டு அடிமை வாழ்க்கை தேடி நடுக்கடலிலும், காட்டிலும் உயிரை துச்சமாக்கி சாகாசப்பயணம் செய்ய தயாராகுகின்றார்கள்.
சில வருடங்கள் புலம்பெயர்ந்த பின் தாய் நாட்டுக்கு செல்லும் பலர் இங்கே வங்கிகளின் கடன் எடுத்தும், வட்டிக்கு கடன் வாங்கியும் ஊருக்கு சென்று தாம் தூம் என ஆடம்பரமாக செலவுகள் செய்வதும் பிறந்தது முதல் மினரல் வாட்டரில் மூழ்கி எழுதவர்கள் போல் பணத்தினை துச்சமாக செலவுகள் செய்து தாங்கள் அரண்மனை வாழ்வு வாழ்வதாய் கண்ணாமூச்சி விளையாட்டு விளையாடி விட்டு மீண்டும் அகதி வாழ்க்கைக்குள் திரும்பி வாங்கிய வங்கிக்கடனுக்காக அடுத்த ஐந்து வருடங்களேனும் வட்டியும் முதலும் கட்ட இரவும் பகலும் குளிரிலும் பனியிலும் வெயிலிலும் ஓடி ஓடி உழைப்பதை எப்போதும் எம்மக்களுக்கு வெளிப்படுத்த மாட்டார்கள்.
இக்கரை மாட்டுக்கு அக்கரை பச்சை க்கதை போல் அங்கிருப்போருக்கு இந்த வாழ்வு சொர்க்கம் போலும் இங்கிருப்போருக்கு அந்த வாழ்க்கை சொர்க்கம் போலவும், காட்சி தந்து மாடாய் உழைத்து ஓடாய் தேய்ந்து நாற்பதில் ஊர் பேர் தெரியாத புதுப்புது நோய்களையெல்லாம் உடலில் தாங்கி மாரடைப்பிலும் போய் சேர்ந்து விடுவார்கள்.
சொந்த நாட்டில் சொந்தம்பந்தம் சூழ வீடு காணி, பட்டம் பதவி என சொகுசாய் மதிப்பாய் வாழ்ந்தாலும், நாட்டை விட்டு வெளியேறி அன்னிய நாட்டில் சரணடைந்து விட்டால் எல்லோரும் அகதியே என்பதை மறந்து விடும் பலர் இங்குண்டாம்.

11 ஜூலை 2017

சிதறும் குடும்ப வாழ்க்கைகள்

மேய்ப்பன் இல்லாத ஆடுகளைப் போல் சரியான ஆலோசனைகளின்றி சிதறும் குடும்ப வாழ்க்கைகள்”.
திருமணங்கள் சொர்க்கத்தில் நிச்சயிக்கப்படுகின்றதோ இல்லையோ பலரின் அகம்பாவங்கள், அதிகாரங்களுக்குள் சிக்குப்பட்டு சின்னாபின்னமாகுவது உண்மை.
ஊருக்குள் பெரியோராய், நல்லவர்களாக வேஷம் தரிப்போரென தங்களை வெளிக்காட்டிக்கொள்வோரின் உள்ளத்து உடைசல்களை அறியாது அறிவுரை, ஆலோசனை எனும் பெயரின் விட்டில்களாய் விழும் கணவன், மனைவி பிரச்சனைக்குள் மூன்றாவதாய் நுழைவோர். ஆண், பெண் எனும் நிலையில் ஒருபக்கச்சார்பாக முடிவெடுக்காது இருவரின் உள, உடல் நிலையினையும் கருத்தில் கொள்வது மிகவும் முக்கியம்.


ஆலோசனையில்லாமையால் எண்ணங்கள் சித்தியாமற்போம்; ஆலோசனைக்காரர் அநேகர் இருந்தால் அவைகள் உறுதிப்படும் என்றாலும்,ஒருபக்கச்சார்பான அவசர ஆலோசனைகள் , உதவிகள் பல நேரம் உயிர், உடல், உள இழப்புக்களையும் பாதிப்புக்களையும் தோற்றுவிக்கும் என்பதை உணராதோராய் இருக்கின்றோமா?
யாருக்கோ தானே? யாரோதானே என இன்றைய நிலையில் எவனுக்கோ நடப்பதை வேடிக்கை பார்க்கும் நம் வாழ்வில் நாளை என்ன நடக்கும் என்பதை அறிவோமா?
ஒரு உயிரை தேடி கடந்த ஐந்து நாட்களாக அலையும் இந்த நொடியில் அவன் செய்த தவறுகள் மறைந்து போனதே!
யாரை நொந்து என்னாகும்?
தொலைத்து விட்டோமே என கனத்து போன மனதுடன் பிரச்சனையில் அடி நுனி புரியாது தொலைத்த பின் தேடிக்கதறும் நொடியில் பிரச்சனையின் ஆரம்பத்தில் எம்மை நாடி இருந்திருக்கலாமே எனும் மன ஆதங்கமும் வலியுமாக.........................கடவுள் பயமற்று போனோமா?
எங்கே சென்று கொண்டிருக்கின்றோம்.
மரணமில்லாத வீடு உண்டா?
பிரச்சனைகளில்லாத குடும்பங்கள் உண்டா?

அடுத்தவர் குடும்ப பிரச்சனைகளில் மூக்கை நுழைத்து ஆலோசனை எனும் பெயரில் அக்கிரமங்களை நடத்துமுன் அதற்கு நாங்கள் தகுதியானோரா என நம்மை நாம் ஆராய்ந்து கொள்வோம்.

23 ஜூன் 2017

அண்ணன் தங்கை பாசம் சொல்லும் பாடல்கள்



படம் இணையத்திலிருந்து  
  1. அண்ணன் ஒரு கோயில் என்றால் தங்கை ஒரு தீபம்
  2. அண்ணன் தங்கை உறவாகும்- மருதாணி
  3. அழகான சின்னத்தேவதை
  4. ஆனந்தக்குயிலின் பாட்டு
  5. இந்த மன்றத்தில் ஓடி வரும் 
  6. இரத்தத்தின் இரத்தமே
  7. எல்லாமே என் தங்கச்சி- என் தங்கை கல்யாணி
  8. எதையும் தாங்குவேன் அன்புக்காக 
  9. எந்தன் பொன் வண்ணமே
  10. என்ன தவம் செய்து விட்டோம் 
  11. என் தங்கை ஆயிரத்தில் ஒருவள் என்று பூக்களும் நட்சத்திரங்களும் சொல்லும், 
  12. ஒரு தங்க ரதத்தில் பொன் மஞ்சள் நிலவு
  13. ஒரு கொடியில் இரு மலர்கள்-காஞ்சித்தலைவன் 
  14. ஒரு நேச மேகம் உயிர் தீண்டும் நேரம் நான் மெதுவாய்க்கரைய
  15. கண்ணனின் சன்னிதியில் 
  16. கல்யாணச்சாப்பாடு போடவா
  17. காத்தாழம் காட்டு வழி
  18. கொடியில் இரண்டு மலர் உண்டு.- உயிரா மானமா?
  19.  சாமந்திப்பூப்போல சாய்ந்தாடம்மா 
  20. சின்னத்தங்கம் என் செல்லத்தங்கம்
  21. பூப்பூவாய் புன்னகைக்கும் இவள்
  22. பூ மழை தூவி வசந்தங்கள் வாழ்த்த
  23. பூ ஒன்று வளர்த்தேன் வாசமும் இல்லை
  24. மல்லிகை முல்லை பொன்மொழிக்கிள்ளை
  25. மலர்ந்தும் மலராத 
  26. மலர்களைப்போல் தங்கை உறங்குகின்றாள்
  27. மானூத்தி மந்தையிலே மாங்குட்டி பெத்த பயிலே
  28. மண்ணைத்தொட்டு 
  29. முத்து நகையே
  30. முத்து முத்தான கண்ணீர்த்துளிகளை விரயம் செய்து ஏன் அழுகிறாய்
  31. தங்க நிலவே உன்னை உருக்கி
  32. தங்கச்சி என் தங்கச்சி தங்கமான தங்கச்சி - ராஜ காளி அம்மன்
  33. தங்கச்சிக்கு சீமந்தம் தவிக்குது என் பந்தம்
  34. தண்ணீரிலே தாமரைப்பூ
  35. தாயின் முகமிங்கு நிழலாடுது
  36. திரு நிறைச்செல்வி  மங்கயர்க்கரசி
  37. தென்  பாண்டித்தமிழே
  38. தென்கிழக்குச்சீமையிலே செங்காத்து பூமியிலே
  39. தோள் மீது தாலாட்ட என் பச்சைக்கிளி நீ தூங்கு
  40. நண்டூருது நரியூறுது
  41. வெண்மேகம் விண்ணில் நின்று கண்ணே இன்று பன்னீர் தூவும்... செவ்வானம் மண்ணில் வந்து மஞ்சள் நீராட்டும்
                                          
Agneepath - Abhi Mujh Mein Kahin ஹிரிதிக் ரோசன் ,

எங்கள் பிளாக்கில்  வெள்ளிக்கிழமை பதிவாக வந்திருக்கும்    வெள்ளி வீடியோ. ஏழேழு ஜென்மம் இந்த அண்ணன் தங்கை சொந்தம் வேண்டும். எனும் தலைப்பில்  அண்ணன் தங்கை பாடல் தொகுப்பை   கண்டதும் நான் சேனைத்தமிழ் உலா வில் ஒருவருடம் முன்பு  பகிர்ந்த பாடல் தொகுப்பு நினைவுக்கு வந்தது. எங்கள் பிளாக் பதிவுப்பாடல் தொகுப்பில் வந்த பாடல்களில்  13  பாடல்கள் என் தொகுப்பில்  இல்லை. அண்ணன் தங்கை பாசம் சொல்லும் பாடல்கள் இத்தனை உண்டென்பதே இப்பதிவுகள் பார்த்ததும் தான் அறிய முடிந்தது. 

ஒரு காலத்தில் இந்த அண்ணன் தங்கை பாடல்களை  இணையத்தில் தேடி இருக்கின்றேன். இணையத்திலும் இத்தனை பாடல்கள் அண்ணன் தங்கை பாசம் சொல்ல இருந்தாலும் அவை  ஒரே தொகுப்பாய் இல்லாமல் அங்கொன்றும் இங்கொன்றுமாக இருப்பதை ஒரு தொகுப்பாக்கினால் என்ன எனும் சிந்தனையில் தோன்றியதே இந்த  பதிவு. 

பாடல்களை ஒலி ஒளியாக வரிவரியாக பதிந்து முழுத்தொகுப்பாக்க நேரம் எடுக்கும் எனினும் இப்பதிவில் முதல் வரிகளை  மட்டும் நினைவு படுத்தும் படி மொத்தம் 39 பாடல்களை   தொகுத்திருக்கின்றேன். 

கீழே இருக்கும் இணைப்புக்களில்   இங்கே தொகுத்திருக்கும் பாடல்களுக்குரிய ஒலிஒளிக்காட்சிதொகுப்பும், வரிகளும் இணைக்கப்பட்டிருக்கின்றது. 

இந்த தொகுப்பில் இல்லாத வேறு பாடல்கள் உங்களுக்கு தெரிந்தால் அதை பின்னூட்டத்தில் சொல்லுங்கள் நட்பூக்களே!

  நன்றி எங்கள் பிளாக்..

கறுப்பு மைப் பொட்டுக்காய்ச்சுவது எப்படி?

பேஸ்புக்கில் இணுவையூர் மயூரன் அவர்கள் பதிவில்  பொட்டுச்சிரட்டை  படம் இட்டிருந்தார். பொட்டுச்சிரட்டைகுறித்த பழைய நினைவுகளுடன் பொட்டுக்காய்ச்சுவது எப்படி என இணையத்தில் தேடினால் சரியாக தரவுகள் இல்லை என்பதனால் நாமாவது நமக்குத்தெரிந்ததை எழுதிப்பதிவாக்கி விடலாம்  என நினைத்து பொட்டுக்காய்ச்ச ஆரம்பித்து விட்டேன். 

புகைப்படம் நன்றி இணுவையூர் மயூரன் 

சிறுவயதில் எங்கள் வீட்டில்  அம்மா தேங்காய்ச்சிரட்டைகளில் பொட்டுக்காய்ச்சி ஊற்றி காயவைத்தும் வைப்பார். வருடக்கணக்கில் அந்த பொட்டுச்சிரட்டை பயன் படும். 

ஸ்டிக்கர் பொட்டு அதிகம் பாவனைக்கு வராத காலங்களிலும்  தினம் பள்ளி செல்லும் போது  சிரட்டையில் இருக்கும் மையை கொஞ்சம் தண்ணீர் தெளித்து தடவினால் கறுப்பு மையாக வரும். அதை  நெருப்புக்குச்சியின் குண்டு முனைப்பக்கமாக  ஒட்டி  நெற்றியில் நடுவில் மேலிருந்து கீழாக  ⧫  கோடு போட்டு கீழே அதே குச்சியின் முனை அளவு ஒரு டொட் வைப்போம். 

                                     
அதிலும் முக்கியமாக சின்னக்குழந்தைகளுக்கு  ஆணானாலும், பெண்ணானாலும்  மூன்று வயது வரையேனும்  நெற்றியில் பெரிதாகவும் கன்னத்தில் சிறிதாகவும் ஒரு பொட்டு வைத்து அழகு படுத்தி விடுவார்கள். எங்கள் வீட்டிலும் இதற்காகவே பொட்டுச்சிரட்டை காலியாகாமல் காய்ச்சப்பட்டு நிரப்பப்பட்டு கொண்டிருக்கும். கன்னத்தில் வைக்கும் குட்டி வட்டம் திருஷ்டிக்கானது என்பதும் நம்பிக்கை தான். 

படம் இணையத்திலிருந்து 

ஸ்டிக்கர் பொட்டு எனும் பெயரில் விதவிதமான வடிவங்களிலும்,வர்ணங்களிலும்  பொட்டுக்கள் வந்த பின்னும்  இந்த சிரட்டைப்பொட்டுக்கு மவுசு இருக்கத்தான் செய்தது.. கொஞ்சம் வளர்ந்த பின் சந்துப்போட்டெனும் பெயரில் குட்டி டப்பாவில் சிவப்புக்கலர் பொட்டு வாங்கித்தந்தார் அம்மா. அதை  நெற்றிக்கு வைத்ததை விட கைவிரல்களுக்கு கியூரெக்சாக  பூசியே சீக்கிரம் முடிந்து போகும், விரல்களுக்கு பூசப்பட்ட சாந்துபொட்டும் அடுத்த  ஒரு மணி நேரத்தில் பட்டை பட்டையாக கழண்டு உரிந்து விடும். அப்போதெல்லாம் எங்களுக்கு சிரட்டைப்பொட்டுத்தான் உதவும். 
                                                படம் இணையத்திலிருந்து 
அதே போல்   கைவிரல்கலுக்கு மருதோன்றி இலைகளை தேடி அரைத்து விரலில்  பத்து போட்டுக்கொண்டு விரல் சிவந்து விட்டதா என  போட்ட மருதோன்றி பத்தை  தூக்கி தூக்கி பார்த்து விரல்களை தவிர உள்ளைங்கையிலும்  அதிகம் சிவந்து  அழுகை அழுகையா வர வைக்கும். மருதோன்றி  இலைகளை  அம்மியில் அரைத்தால் அதற்கும் அடி விழும், பயந்து பயந்து ஒழித்து மறைத்து அரைத்து  விரலில் ஒட்டிக்கொண்டு அதையும் மறைந்து விடலாம் என நம்பிய  காலங்கள் அவை.  

அரிசிக்குறுனையில் தான் அப்போதெல்லாம்   பொட்டுக்காய்ச்சுவார்கள், இப்போது சவ்வரியிலும் காய்ச்சுகின்றார்கள். அரிசிக்குறுணையை விட சவ்வரிசி விலை அதிகம் என்பதனால் பெரும்பாலும் அரிசிக்குறுணை தான் பொட்டுக்காய்ச்ச பயன் படும். வசதி இருப்போர் சவ்வரிசியிலும் காய்ச்சலாம்.சவ்வரிசிப்பொட்டு சற்று அதிக பசைத்தன்மையோடிருக்கும்.

பொட்டுக்காய்ச்சுவது எப்படி?

ஒரு கைப்பிடி சவ்வ்ரிசி அல்லது அரிசிக்குறுணையை  மண் சட்டியில் (மண் சட்டி கிடைக்காவிட்டால் வாணலியில் காய்ச்சலாம்.)   போட்டு அடுப்பை பற்ற வைத்து நிதானமாக மிதமான சூட்டில் வறுக்கும் போது குறுணை  முதலில் வறுபட்டு   நிறம் மாறி  தொடர்ந்து வறுக்க கறுப்புக்கலராகி நல்ல மைக்கறுப்பாகும் போது  அப்படியே திரண்டு   ஒன்றோடொன்று ஒட்டிக்கொள்ளும் பதத்தில்  ஒரு கப் தண்ணீரை விட்டு  கொதிக்கும் வரை காய்ச்ச வேண்டும். இதனுடன் சிறிது பர்வ்யூம் சேர்த்தால் . பொட்டு வாசனையாக இருக்கும், செவ்வரத்தம் பூவின் சாறு அல்லது தேங்காய் எண்ணெய் கொஞ்சம் விட்டு காய்ச்சினால் பொட்டு பளபளவென  இருக்கும். நாங்கள்தேங்காய் எண்ணெய்  ஒரு துளி விட்டுக்காய்ச்சுவோம். 

பொட்டுக்காய்ச்ச முன் காய்ச்சிய மையை ஊற்ற  தேங்காய்ச்சிரட்டையை இருபக்கமும் நல்லா வளவளப்பாக  பளீச் என சீவி தயார் செய்து கொள்வது முக்கியம். பொட்டுக்காய்ச்சியதும் அதை சிறு துணியினால் வடிகட்டி எடுத்தால்  சகடுகள் எல்லாம் தனியாகி  திக்காக இருக்கும்   மையை அதற்கென தயாராக இருக்கும் சிரட்டையில்    ஆப்பச்சட்டியில் மா ஊற்றி சுழட்டுவது போல் சிரட்டைக்குள் சுழற்றினால்    சிரட்டையில் பரவலாக ஒட்டும். எனினும் சிறிது நேரத்தில் கீழே வடிந்து நடுவில் சேரும். கவலை வேண்டாம். அப்படியே ஆற விட வேண்டும்.. பொட்டுக்காய்ச்சி ஆறவைத்து பதப்படுத்தும் பணி ஒரு நாளில் முடியாது என்பதை புரிந்து  பொறுமையாக 
காய்ச்சிய மையை  சிரட்டையில் ஊற்றி சுழட்டி  ஒரிடத்தில் அசைக்காமல் காய விட வேண்டும். இரண்டாம் மூன்றாம் நாளில்     மை சிரட்டையின் நடுவில்  தேங்கி  மேலே  பாலாடைபோல் படர்ந்து இருக்கும் அதை உடைத்து மீண்டும்   சில தடவை  சிரட்டைக்குள் பரவலாக படும்படி சுத்தி  காய வைக்க வேண்டும். இப்படி முழு மையும்,  சிரட்டையில் பரவலாக சம நிலைக்கு வரும் வரை  சிரட்டையை சுழற்றி காய விட்டால்  ஒரு வாரத்தில் மை இறுகி பொட்டுப்பதத்தில் வந்து விடும். 

அதில் ஒரு துளி நீர் விட்டு குழைந்தால் பொட்டு தயார். கடைகளில் வாங்கிப்பயன் படுத்தும் பொட்டுக்களில் இரசாயனங்களை சேர்த்து தோலுக்கு ஒவ்வாமை வரலாம். ஆனால் வீட்டில் இவ்வாறு காய்ச்சி பதப்படுத்தி பயன் படுத்தினால் வருடக்கணக்கில் அந்த பொட்டுச்சிரட்டை  குறைந்த செலவில் ஆரோக்கியமானதாகவும் நீண்டகால பயனுடனும் இருக்கும், 

19 ஜூன் 2017

சட்டியுடன் ஒட்டி உறவாடும் தோசையை பிரிப்பது எப்படி?

டிப்ஸ் டிப்ஸ் டிப்ஸ்
தோசை வார்க்கும் சட்டிகளில் பரோட்டா, சப்பாத்தி, போன்றவைகளும் எண்ணெய் சேர்த்த பொரியல்வகைகளும் செய்தால் சட்டியிலிருந்து தோசை கிளம்பாமல் ஒட்டிக்கொண்டு அடம்பிடிக்கும், இரும்புச்சட்டியிலோ, நான்ஸ்டிக் சட்டியிலோ தோசை வார்க்க முன் சட்டியை அடுப்பில் வைத்து சூடாக்கி அதன் மேல் சமையல் உப்பை தூவி கோல்ட் கலராகும் வரை வறுத்து கொட்டி விட்டு சட்டியை கழுவி அல்லது நன்கு துடைத்து மீண்டும் சூடாக்கி எண்ணெய் தடவி தோசை வார்த்து பாருங்கள் முதல் தோசை அடம் பிடிக்கும், இரண்டாம் தோசை ஜம்ம்ம்முன்னு இலகுவாக மேலே கிளம்பி வரும், புதிய ஆப்பச்சட்டியைப்பழக்கவும், புதிய தோசைக்கல், சட்டிகளை பழக்கவும் இதே முறை தான்.

14 மே 2017

அன்னையர் தின வாழ்த்தென்பது...!

முந்தா நாள் குடித்த 
டீக்கப்பும், 
நேற்று சாப்பிட்ட எச்சில் தட்டும் 
மூலையெங்கும் சிதறிக்கிடக்கும்
அழுக்கு ஆடைகளும், 
துவைத்து மடித்ததை 
எடுத்தடுக்க உதவாத 
உள்ளங்களுமாய்

விண் தொட்டாலும் 
மண்ணுக்குள் மனம் புதைத்து

ஒற்றை ரோஜாவும், 
ஒரு நாள்” நினைவும்
ஒரிரு வார்த்தைகளும்
போதுமென 
நினைப்போரின் 
அன்னையென்பதை விட 
அனாதையாய் இருத்தல் சிறப்பே.

அன்னையின் மனதை கொன்று 
அவள் சமாதி மேல் வைத்த 
மலர் வளையங்களாய்

அன்னையர் தினத்தின வாழ்த்து!

11 மே 2017

இலக்கில்லாத ஓட்டத்தில் இலக்கியத்துக்கு இடம் இல்லை.

எல்லோரும் நலமாக இருப்பதோடு  எவர் பதிவிலும் பின்னூட்டமிடாமலும் என் பக்கம் பதிவிடாமலும் போனதனாலே என்னை மறந்தும் போயிருக்க மாட்டீர்கள் என நினைக்கின்றேன். 
அவர்கள் உண்மைகளும், ஏஞ்சலின், ஆதிரா, கீதா என பட்டாளம் எப்போதும் போல வலையை கலகலக்க வைப்பதை படித்து  நானும் ஏதேனும் எழுத வேண்டுமே  என என் கையும் மனமும் துறுதுறுவென அரித்தாலும் உண்மையில்  முடியவில்லை. 
 என்னைப்பற்றி நான் என எந்த நேரம் எழுத வேண்டும் எனும் அன்புக்கட்டளையோடு மனசு தள குமார் மெயிலிட்டாரோ அன்றிலிருந்து ஓய்வில்லாத ஓட்டம். 
எதைத்தேடி ஓடுகின்றேன்?
இதன் இலக்கு என்ன? 
  ஒருவகை மாயை வலையாய் என்னை சுற்றி நிற்கும் ஈவண்ட்ஸ் தொடர் ஆர்டர்களுடன்., சுவிஸுக்கு வருகை தரும் உல்லாசப்பயணிகள் அதாவது   எங்கள் பகுதி உல்லாசப்பயணிகளுக்கு பிரதானமாக இடம் என்பதனால் இந்தபக்கமாக வரும்  இந்திய பயணியருக்கான உணவுக்கான கன்ராக்ட்   என   நாளாந்தம் 300 உணவுகள்  தயார் செய்ய வேண்டி இருப்பதனாலும், புதிய வேலையாட்களுக்கு வேலைகளை எங்கள் நிறுவனத்துக்கு ஏற்ப பழக்க வேண்டி இருப்பதனாலும்  ஏப்ரல் 15 ஆம் திகதிக்கு பின்  காலை ஒன்பது  முதல் இரவு பன்னிரண்டு வரையில் எங்கள் ஹோட்டலில் குடியிருக்க ஆரம்பித்ததான ஓட்டத்துக்கு இலக்கில்லாமல்   இருக்கின்றதோ எனும் ஐயம் தோன்றுகின்றது. இந்த ஓட்டம் எப்போது  முடியும்? எனக்கே தெரியவில்லை. இலக்கில்லாத சாதனை ஓட்டத்தில் இலக்கியத்துக்கு இடமும் இல்லை.

போதும் எனும் மனமே பொன் செய்யும் மருந்து என்பார்கள். பல விடயத்தில் நான் போதும் போதும் என நினைத்து செயல்படுவதனாலோ என்னமோ எனக்கான இலக்குகள் விரிந்து கொண்டு..... நான் தேடாமலே  வழிகளை விசாலமாக்கிக்கொண்டு  சென்று கொண்டே இருக்கின்றது.

இல்லை இல்லை இல்லை என இல்லை யால் தொல்லைப்படுவோர் மத்தியில் போதும் போதும் என நான் சொல்லி விலகினாலும் விலக முடியாத சிலந்தி வலைபோல்  நிறுவனத்தின் வளர்ச்சியும், வேகமும் நேரடியாக என்னை சந்திப்போர் தரும் பாராட்டுக்களும் பிரமிப்புக்களுமாக  என் எல்லைகளை விரித்துக்கொண்டே செல்கின்றனர். 

இந்த மாதத்தில் நான் கற்ற்தும் பெற்றதுமாக முக்கிய செய்தி உண்டெனில் 
ஒவ்வொரு முதலாளியும் அவர்தம் நிறுவனத்தின் முதல் தொழியாளியாகும்  போது மட்டுமே உழைப்பாளிகளின் உணர்வுகளை 
புரிந்திட முடியும்.

நம் நிறுவனம் சிறப்பாக நற்பெயரோடு இயங்க தொழிலாளிகளாம் உழைப்பாளர்களின்  மன மகிழ்ச்சியும், உண்மையும் நேர்மையும் அவசியம் எனதைபுரிந்தவர்கள் இலக்குகளுக்கு எல்லை இல்லை. 
முதலாளியாக நாம் தொடர்ந்து நீடித்து நிலைக்க  தொழிலாளிகளின் அனைத்து  பணியிலும் தேர்ச்சியும் பெற்றிருக்க வேண்டும். அப்போது தான் அவர்கள் உணர்வுகளும்  தேவைகளும் நமக்கு புரியும்.  நம்மால் இயலாத ஒன்றை  நம்மிடம்   பணத்தேவைக்காக வேலை செய்யும் தொழிலாளிகள் மேல் திணிப்பதும் அவர்களின் பணிகளைக்குறித்து அறியாமல் கால நேரங்களை நிர்ணயித்து நாமே முடிவெடுத்து மனிதர்களை மாடுகளாய் நடத்த நினைப்பதும் நம் நிறுவன வளர்ச்சிக்கு நல்லதல்ல.   
அர்ப்பணிப்போடு வேலைக்கு வரும் உண்மையும் நேர்மையுமான தொழிலாளர்களை கண்டு பிடிப்பது கடினம் எனில் அவர்களை இழக்காமல் தக்க வைத்துக்கொள்வது அதை விட கடினம். 
இம்மாதிரி நிரம்ப கற்றல்களும் பெற்றல்களுமாக  சுவிஸில் இன்னொரு கேட்டரிங்க நிறுவனத்தோடு இணைந்து எங்கள் ஹேகாஸ் கேட்டரிங்கும் தனக்காக புதிய பாதையில்  மிக வேகமாக பயணித்துக்கொண்டிருக்கின்றது.  
➽➽➽➽➽➽➽➽➽➽➽➽➽➽➽➽➽➽➽➽➽➽➽➽➽➽➽➽➽➽➽➽➽➽➽➽➽➽
இணையத்தை அதிலும் பேஸ்புக்கைக்குறித்து எதிர்மறையான சிந்தனைகள் புரிதல்கள் பல இருந்தாலும்  கடந்த பத்தாண்டுகால இணைய அனுபவத்தில் நான் இங்கு கண்டதெல்லாம் நன்மையும்   நல்லவர்களின் அன்பும் நட்பும் மட்டுமே என்பதனால்  இன்று வரை இணையத்தொடர்புகளை சரியாகவே பயன் படுத்தி கொண்டு வந்திருக்கின்றேன், 
 பேஸ்புக்கை நான் நீண்ட காலமாக லைக் பேஜ் மூலம்  வியாபார தொடர்பாடல் களமாக பயன் படுத்துவதன் மூலம் சுவிஸில் பல ஆர்டர்களை பெற்றிருந்தாலும் கடந்த வருடத்தில் ஜேர்மனிலிருந்து வந்த ஆர்ட்கள் சிலவற்றை ஏற்றுக்கொள்ள முடியாது போயிருக்கின்றது. 
   
கடந்த நான்கு நாட்கள் இந்தியாவிலிருந்து வந்திருந்த உல்லாசப்பயணிகளுக்கான  மதிய இரவு உணவுக்குரிய மொத்த ஆர்டர்களும்,  எங்கள் பேஸ்புக் லைக்பேஜில் நான் இடும் புகைப்படங்கள் பார்த்தும் கருத்துக்களை படித்துமே உங்களை நாங்களாக மெயில் மூலம் தொடர்பு கொண்டோம் என சொன்னார்கள். .. அடுத்து வரும் தொடர் பயணத்திட்டங்களிற்கும் எங்களிடம் உணவு ஆர்டர் செய்வதாகவும் சொல்லி சென்றிருக்கின்றார்கள். 
இணையத்தினை நாங்கள் பலவகைகளில் நன்மையாக  இலவச விளம்பரத்தேவைக்கும் பயன் படுத்தலாம் என்பதனால் நானும் இனி இங்கும் என் நிறுவனத்தினை விளம்பரப்படுத்த நினைத்திருக்கின்றேன். 

தங்கள் விடுமுறைக்காக சுவிஸ் வர திட்டமிடும் நட்பூக்கள் எங்களை தொடர்பு கொள்ளுங்கள்.  உணவு மற்றும் தங்குமிடதேவைகளை மிகக்குறைந்த செலவில் செய்து தருவோம் என்பதோடு சைவ, அசைவ ஜெயின் உணவுகளை  வீட்டுச்சாப்பாட்டு சுவையில் பக்குவமாக தரமாக பொருட்களை கொண்டு சுவையாக சமைத்தும் தருவோம். 

பயணத்திட்டங்களை  திட்டமிடும் நிறுவனங்கள்,  சினிமா படப்பிடிப்புக்களுக்காக குழுக்களாக வருவோரும் தொடர்பு கொள்ளலாம், 
எங்கள் லைக் பேஜ் புகைப்படங்கள் அனைத்தும் எங்கள் நிறுவன சொந்த அலங்கரிப்புப்படங்களே!
இணைப்பை சொடுக்கினால் படங்களின் அணிவகுப்பை காணலாம். . 

➽➽➽➽➽➽➽➽➽➽➽➽➽➽➽➽➽➽➽➽➽➽➽➽➽➽➽➽➽➽➽➽➽➽➽➽➽
கடந்த வாரத்தில் எங்கள் திருமண மண்டபத்தில்  நடந்த பிறந்த நாள் விருந்தின் உணவுகளின்  அலங்காரமும் அணிவகுப்பும்.  


வரவேற்பு சிற்றுண்டிகளாக... 
ஆட்டிறைச்சியில் செய்யப்பட்ட  ரோல்ஸ், மீன் உருளைக்கிழங்கு சேர்ந்த  கட்லெட், மரக்கறி வைத்த சமோசா, செர்ரி தக்காளி, சீஸ், ஓலிவ்காய் மற்றும் வெள்ளரிக்காய் கொண்டு அலங்கரிக்கப்பட்ட பூக்கொத்துடன் பல வகை வெஜ் குட்டிப்பிட்சாக்களும் காப்பி, தேனீர் ஆரஞ்சு பானங்களும் இந்த மேசையில் உள்ளது. 
மாம்பழத்துண்டங்களுடன் மெலோனும் பெஷன் ப்ருட் ஐஸ்கிரிமும் இங்குண்டு. 

அன்றைய நாள் மேடை அலங்காரம், பிறந்த நாள் கேக் வைக்க முன். 




 உணவுக்கு பின்  இனிப்பு உணவுகள் அன்னாசி,ஆரஞ்சு, மா, திராட்சை, ஸ்டோபெர்ரி,  தர்பூசனி, மாதுளம்  பழங்களின் அலங்கரிப்பும்,  பன்ன்ங்கொத்தா, திராமீசூ எனும் சுவிஸ் நாட்டு ஸ்பெஷல்  இனிப்பும் இங்கே வைக்கப்பட்டிருக்கின்றது. 

செர்ரி தக்காளி, சீஸ், ஓலிவ்காய் மற்றும் வெள்ளரிகாய் கொண்டு அலங்கரிக்கப்பட்ட பூக்கொத்து. 
இத்தனையும்  என் நேரடி திட்டமிடலிலும், தயாரிப்பிலும் என்பதனால் தினந்தோறும் என் சிந்தனைகள்  நிறுவன வளர்ச்சி, அதற்கான திட்டமிடல், பிள்ளைகளின் தேவைகள் நேரத்துக்கு உணவு மற்றும் வீட்டுத்தேவைகளை கவனித்து நிறுவனத்தினையும் நடத்துதல் என எழுத்துக்காக சிந்தனையை தூரமாக்கி விட்டது.

மீண்டும் வரும் வரை.....  நிச்சயம் வருவேன். 

10 மார்ச் 2017

தோழி எனும் பெயரில் வந்த போலி!

யானைக்கும் அடி சறுக்கும்.
ஆமாம், இணையத்தை பாதுகாப்பாக பயன் படுத்துவதாக நிரம்ப பெருமையாக நினைத்துக்கொண்டிருந்தேன். முகமில்லா போலிகளை நட்பில் இணைத்ததில்லை. அறிந்தோர் தெரிந்தோர், அறிந்தோருக்கு தெரிந்தோர் எனும் வகையில் மட்டுமே சில நூற்றுக்குள் என் நட்பு சுருங்கி விட்ட நிலையில்....

மருந்தெனும் பெயரில் மயக்கமா ?

கடந்து போன வருட முடிவும் இந்த வருட ஆரம்பமும் எங்கள் வீட்டில் மகன், மகள்  இருவருக்கும் ஒருவகை வைரஸ் காய்ச்சல், இருமல் தடிமலுடன் தான் ஆரம்பமாகியது.

08 மார்ச் 2017

07 பிப்ரவரி 2017

சிறுவர் பாடல்கள்.. புலி வருது

ஆடு மேய்க்கும் ஆனந்தன்
ஆட்களை ஏய்ப்பதில் வல்லவனாம்.
பொய்கள் பலவும் தினம் சொல்லி
போக்குக்காட்டி சிரிப்பானாம்.
புலி வருது, புலி வருது என்றே
தினமும் கத்துவானாம்
கேட்டு பயந்த மக்களெல்லாம்
பதறி ஓடி ஒளிவதனை.
கையைக்கொட்டி ஆனந்தன்
தினமும் பார்த்து சிரிப்பானாம்.
திடுக்கிடும் பொய்யதை கூறியதானால்
திட்டித்தீர்த்தனர் பொது மக்கள்

06 பிப்ரவரி 2017

எரிகின்ற கொள்ளியில் எது நல்ல கொள்ளி?

ஓவர் கான்பிடன்ஸ் உடம்புக்கு மட்டும் அல்ல நாட்டுக்கும் ஆகாது.
இந்தம்மாவை குறித்து வேலைக்காரி வீடியோக்காரி,என திட்டி திட்டியே இந்தம்மா மீதான பரிதாபத்தினை அதிகரிக்க செய்து விடுவார்கள் போல் எங்கெஙுகும் காணும் விமர்சனங்கள் தனிமனித சாடலாக இருப்பதை காணும் போது வேலைக்காரி என்றால் அத்தனை மட்டமா என எதிர்க்கேள்வி எனக்குள் வருகின்றது.

04 பிப்ரவரி 2017

இலங்கையில் சுதந்திர தினம்????





சுதந்திரமாம் சுதந்திரம் சொக்க வைக்கும் சுதந்திரம் 
சொந்த மண்ணில் அடிமையாய் விந்தையான சுதந்திரம் 
சுப்பன் சொன்ன சுதந்திரம் சுகமாய் கிடைத்த சுதந்திரம் 
கப்பல் ஏறி கடலிலே மறைந்து போன சுதந்திரம்

30 ஜனவரி 2017

ஆங்கோர் ஏழைக்கு எழுத்தறிவித்தல்

ஆங்கோர் ஏழைக்கு எழுத்தறிவித்தல்

'அன்ன சத்திரம் ஆயிரம் வைத்தல்
ஆலயம் பதினாயிரம் நாட்டல்
 பின்னருள்ள தருமங்கள் யாவும்
 பெயர் விளங்கி ஒளிர நிறுத்தல்
அன்னயாவினும் புண்ணியம் கோடி
ஆங்கோர் ஏழைக்கு எழுத்தறிவித்தல்'

26 ஜனவரி 2017

எங்கே இருக்கின்றீர்கள் மாமா?

என் சுந்தரம் மாமாவை தேடுகின்றேன்
எங்கே இருக்கின்றீர்கள் மாமா?
 ******************************************************************************************************** 
மருமக்களே என எங்களை அதட்டி, கண்டித்து அக்கறையும் அன்புமாக எங்கள் மேல் பாசம் காட்டிய அன்பான மாமா, எங்களுக்காக சண்டை போடும் பாசமான மாமா எங்கள் சுந்தரம் மாமா
நீங்கள் எங்கே இருக்கின்றீர்கள்?
யாரேனும் எங்க அம்மாவை திட்டினால் சாரத்தை மடித்து கட்டிக்கொண்டு சண்டைக்கு போவதனால் சண்டியன் மாமா என சொல்வோமே மாமா.
எங்களை யாருமே ஒரு சொல்சொல்ல விடாமல் பொத்திப்பொத்தி பாதுகாப்பீர்களே மாமா.
என் பூப்புனித நீராட்டு விழாவில் அம்மாவுடன் பிறந்த 3 அண்ணாக்களில், நீங்கள் மட்டும் தான் மாமா நான் நன்றாக வாழ வேண்டும் என ஆசிர்வாதீத்தீர்கள். அந்த நாட்களில் அப்பாவும் எங்களுடன் இல்லாத நிலையில் அப்பா ஸ்தானத்தில் என்னை ஆசிர்வதித்தீர்கள் மாமா.உங்கள் ஆசீர்வாதம் நான் நன்றாக இருக்கின்றேன் மாமா. ஆனால் நீங்கள் எங்கே இருக்கின்றீர்கள் என தெரியவில்லை மாமா.
தப்புச்செய்தால் கண்டிக்கும் நீங்கள் எங்களுக்கு சமதையாக என்னை கிண்டல் செய்வது போல் என்னை ஓமாக்கும் என சொல்லி கேலி செய்வீர்களே மாமா.எங்கே போனீர்கள் மாமா?
அம்மா வழி உறவில்   உங்களை போல் எவரும் எங்கள் மேல் பாசமும், அக்கறையும் காட்டியதே இல்லை மாமா. நாங்கள் கஷ்டப்பட்ட போது நீங்களும் கஷ்டத்தில் இருந்தாலும் மாமிக்கு தெரியாமல் அன்பையும் அக்கறையையும் கொட்டி பத்திரமாக பாதுகாத்தீர்கள்.

அம்மாவின் மேல் பிரியமாக அம்மாவை பாதுகாக்கும் அண்ணாவாக நீங்கள் மட்டும் தான் அக்காலத்தில் இருந்தீர்கள்.  மாமா என்றால் எனக்கு  உங்கள்  அதட்டலும், அன்பும் மட்டும் தான் நினைவில் இருக்கின்றது மாமா.

முதல் நாள் வந்து வீட்டுமுற்றத்தில் அமர்ந்து  நான் சின்னவளாயிருந்தாலும் தேங்காப்பூவும்  கோதுமையும் சேர்த்து  வாழையிலையில் தட்டி விறகடுப்பில் சுடும் ரொட்டி வாங்கி சாப்பிட்டு விட்டு அம்மம்மாவிடம் நாளைக்கு  திருகோணமலை டிரிப் இருக்கம்மா என சொல்லி போனீர்கள். திரும்ப வருவேன் என சொல்லிப்போனீர்கள்.

நீங்கள் எங்கே தான் போனீர்கள். 
வருவீர்கள் என நம்பிக்கொண்டே இருக்கின்றோம்.
எங்கே போனீர்கள் மாமா?

என் மாமாவைத்தேடி நானும்.....!
********************************************************************************************************
எங்கள் அமமாவின் குடும்பம் விவசாயக்குடும்பம், இலங்கையின் திருகோணமலை மாவட்டத்தில் இருக்கும் புகழ் பெற்ற திருக்கோணேஸ்வர் கோயில் புகழ் தம்பலகாமத்தில் நெல் வேளாண்மை தான் குடும்பத்தொழில்,
அம்மாவின் மூன்றாவது அண்ணா சுந்தரம் எனப்படும் சுந்தரலிங்கம்
நாட்டுப்பிரச்சனையாலும் விவசாயம் செய்ய முடியாத படி பாதுகாப்பற்ற சூழலாலும் இடம் பெயர்ந்து மட்டக்களப்புக்கு வந்து மட்டக்களப்பு பேருந்து போக்குவரத்து சபையின் சாரதியாக சேர்ந்து... வயலில் உழுவதற்கு ட்ராக்டர் ஓடிய அனுபவம் .. சாரதி அனுமதிப்பத்திரம் பெற உதவியது.... 1989 ஆவது ஆண்டின் இறுதியில்... மட்டக்களப்பு திருகோணமலை பஸ் சாரதியாக பணியில் இருக்கும் போதே... செக்கிங் இராணுவமுகாமின் முன் பஸ் நிறுத்தபப்ட்டு விடுதலைப்புலிகளின் கொடி மாமாவில் கையில் வலுக்கட்டாயமாக கொடுக்கப்பட்டு மாமாவை அங்கிருந்த இராணுவமுகாம் உள்ளே கொண்டு சென்றார்களாம்.
பஸ்ஸில் பயணித்து மாமாவை அறிந்தோர் தந்த தகவல் கேட்டு...... அம்மா, அம்மம்மா, மாமி தேடி ஓடி..... அதன் பின் மாமா திரும்பவே இல்லை.
உயிரோடு இருக்கின்றார் என இன்றுவரை நம்பிக்கொண்டிருக்கின்றோம்.
அதற்கு சில வருடம் முன் மூத்த மாமாவின் மகன் மகேந்திரன் அத்தான். காணாமல்  போனான். எங்கே போனான்,,யார் அழைத்துப்போனார் எனும் விபரம் எதுவும் இல்லை. ஆனால் ...... ?
நாங்கள் எங்கள் குடும்பத்தில் மாமாவை மட்டுமல்ல மாமாவின் மக்களையும் இழந்தோம்.
அவர்கள் உயிரோடு இல்லை என இதுவரை நம்ப முடியவில்லை. எங்கோ இருக்கின்றார்கள் எனும் நம்பிக்கை தான் எம் உயிர்ப்பை நகர்த்துகின்றது.
காணாமல்போனோரை தேடி..... நானும்.... !
நீண்ட பதிவு தான் .. கொஞ்சம் படியுங்களேன். 
 ******************************************************************************************************** 

ஈழத்தமிழருக்கான விடுதலைப்போரானது திசை மாற்றம் பெற்று ஈழத்தமிழரெல்லாம் தீவிரவாதிகள் என முத்திரை குத்தி எம்மை நேசித்த மக்களால் தீண்டத்தகாதவர்கள் போல் வெறுக்கபப்ட்டு, எம்மை அழித்தொழித்த போது கண்டு காணாமல் எமது கதறல்களில் நேரம் கண்ணிருந்தும் குருடனாய், காதிருந்தும் செவிடராக்கி எமக்காக துடித்த இதயங்களை தூரமாக நிறுத்தியதில் இந்திய மத்திய அரசாங்கத்துக்கு பெரும் பங்குண்டு.
தமிழர் ஒன்றுபட்டால் தமது ஏகாதிபத்திய அடிமைத்தளைகள் அவிழ்ந்து விடும் என ஒரு தாய் வயிற்றுப்பிள்ளைகளாய் உறவாடியோரை எதிரிகளும் துரோகிகள் ஆக்கி..........
எய்தவர்கள் பணமும்,பவிசும், பதவியுமாக தேசத்தின் வீரர்களாக நெஞ்சை நிமிர்த்தி நிற்க... உள்ளிருக்கும் துரோகங்கள் அறியாமல் துணை போனோர்.......எம் விரல் கொண்டே எம் கண்ணை குத்தும் முயற்சிக்கு பலகடாவாக்கப்பட்டோர் இன்றுவரை துரோகிகளாய்.. குற்றவாளிகளாய். தம் வாழ்க்கையை பணயம் வைத்து .. விடுதலைக்காக போராடிக்கொண்டிருக்கின்றார்கள்.
அன்று போல் இன்றும் நம் விரல் கொண்டே நம் கண்ணைகுருடாக்கி... பிரித்தாளும் சூழ்ச்சிகளுக்கு நாம் அறியாமல் துணை போகவும் வைக்கின்றார்கள்.
உலக வல்லரசுகள் இணைத்து உடமைக்கும் உரிமைக்குமாக ஈழமக்களின் போராட்டத்தினை 2009 ஆம் ஆண்டில் நசுக்கினார்கள். உலகமே வேடிக்கை பார்த்தது. உலகத்தமிழினமும் தம் மனக்கதவை குருடாக்கிக்கொண்டது.
ஒரே நாளில் எமது நம்பிக்கைகளை நாசமாக்கி
இலட்சக்கணக்கான மக்களின் வாழ்வாதாரங்களை சிதறடித்தார்கள். காலம் காலமாக கட்டிக்காத்த எம் வளங்கள் அழிக்கப்பட்டன. உயிர்கள் பறிக்கப்பட்டன, எம் பிஞ்சுகள் மேல் தடை செய்யப்பட்ட வெடிகுண்டுகள் வீசப்பட்டு அங்கவீனர்கள் ஆக்கப்பட்டார்கள்.
அன்றிலிருந்து இன்று வரை விடியலை தேடி........
வலிகளும் வேதனைகளும் மட்டுமே நிரந்தரமாய் மீட்சி இன்றி.... எமக்காக குரல் கொடுக்க எவருமே இல்லையா என ஏங்கத்தோடு..... காத்திருக்கின்றார்கள்.
கத்தியின்றி, இரத்தமின்றி சத்தமில்லாமல் அங்கே இன அழிப்புப்போர் நடந்து கொண்டிருக்கின்றது.
போராட்ட காலங்களில் இலங்கையின் பல பாகங்களிலிருந்தும் பலர் உயிரோடு காணாமல் போனார்கள்.காணாமல் போக்கடிக்கபப்ட்டார்கள்.
*அவர்கள் எங்கே போனார்கள்?
*அரசினால் கைது செய்யப்பட்டவர்களும், சரணடைந்தவர்களும் எங்கே?
* உயிரோடிருக்கின்றார்களா?
**எங்கே இருக்கின்றார்கள்?
*என்னென்ன சித்திரவதை அனுபவிக்கின்றார்களோ? *எங்கே ஒளித்து வைக்கப்பட்டிருக்கின்றார்களோ?
தவிக்கும் தாய், கதறும் மனைவி, தேடும் குழந்தைகளின் கண்ணீர்க்குரல் உங்கள் காதில் கேட்கின்றதோ?
உயிரோடில்லை என்றாவது சொல்லி விட்டால் மாண்டார் மீள்வதில்லை எனும் நிம்மதியேனும் மிஞ்சுமே..
அவர்கள் செய்த தப்பென்ன?
தம் உரிமைக்காக போராடியது தவறா?
அவர்களை கைவிடலாமா?
இனியேனும் சிந்தியுங்கள்.
இலங்கையில்நல்லாட்சியின் அரசாங்கமாம். அவர்கள் காதில் கேட்கும் படி கொஞ்சம் சத்தமாக ஒரு மனமாய் நீதியின் கதவைத்தட்டலாம்.
வாருங்கள் உறவுகளே!
இத்தனை வருடம் தனித்தே கதறுவதால் யாருமில்லா அனாதைகள் தானே எனும் அசட்டைத்தனத்தால் தம் காதுகளை அடைத்துக்கொண்டார்களோ?
உங்களுக்காக நாங்களும், எங்களுக்காக நீங்களும், நமக்காக நமக்கானதை கேட்டு பெறும் நிலையில் நிர்க்கதியாகி இருக்கின்றோம் எனும் உண்மை புரிந்துகாணாமல் போன தன் உறவுகளை தேடி.....
தன் உயிரை துச்சமாக்கி... ஆகாரமின்றி அறவழியில் உண்ணாவிரதம் இருக்கும் எங்கள் தாய்மாரின் கண்ணீர் துடைக்க வாருங்களேன்.